மோட்டார் சைக்கிளில் வைத்திருந்த நகை மற்றும் பணம் திருட்டு போன சம்பவம் பரபரப்பை ஏற்படுத்தியுள்ளது.
தஞ்சாவூர் மாவட்டத்திலுள்ள பூண்டி பகுதியில் முருகானந்தம் என்பவர் வசித்து வருகின்றார். இவர் அடகு கடை நடத்தி வருகின்றார். இந்நிலையில் கும்பகோணத்தில் ஒரு தனியார் நிதி நிறுவனத்தில் இருந்து 3 பவுன் நகை மற்றும் ஒரு துணிப்பையில் 32 ஆயிரத்து 714 ரூபாயை எடுத்துக்கொண்டு முருகானந்தம் மோட்டார் சைக்கிளில் தஞ்சை நோக்கி வந்து கொண்டிருந்தார்.
அப்போது தஞ்சை தெற்கு பிரதான சாலையில் உள்ள ஒரு டீக்கடை முன்பு முருகானந்தம் தன் முகத்தை கழுவுவதற்காக வண்டியில் பணம் மற்றும் நகையை வைத்துவிட்டு சென்றார். இதனையடுத்து முருகானந்தம் முகத்தை கழுவிட்டு வந்து பார்த்தபோது வண்டியில் வைத்திருந்த பணம் மற்றும் நகை திருட்டு போனதை பார்த்து அதிர்ச்சியடைந்தார். இதுகுறித்து முருகானந்தம் கொடுத்த புகாரின்படி போலீஸ் சிறப்பு சப்-இன்ஸ்பெக்டர் பழனியாண்டி மற்றும் காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.