கமல்ஹாசனின் வேட்டையாடு விளையாடு இரண்டாம் பாகத்தில் அவருக்கு ஜோடியாக கீர்த்தி சுரேஷ் நடிக்க இருப்பதாக தகவல் வெளியாகியுள்ளது
இயக்குனர் கௌதம் மேனன் இயக்கத்தில் உருவான வேட்டையாடு விளையாடு படத்தில் கமல்ஹாசன், ஜோதிகா, கமாலினி, முகர்ஜி, பிரகாஷ்ராஜ், டேனியல் பாலாஜி போன்றோர் நடித்திருந்தனர். இப்படம் 2016 ஆம் ஆண்டில் வெளியாகியது. இதனைத் தொடர்ந்து தற்போது இப்படத்தின் இரண்டாம் பாகம் எடுப்பதற்கான முயற்சிகள் மேற்கொள்ளப்பட்டுள்ளன. இத்தகைய முடிவை இயக்குனர் கௌதம் மேனன் உறுதிப்படுத்தி இருக்கிறார். தற்போது கமல்ஹாசன் இந்தியன் 2 என்ற படத்தை கைவசம் கொண்டுள்ளார் எனவும், இப்படத்தின் படப்பிடிப்பு விபத்து மற்றும் கொரோனா ஊரடங்கு தற்காலிகமாக நிறுத்தப்பட்டுள்ளது, ஊரடங்கு முடிந்த பிறகு படப்பிடிப்பு தொடங்க உள்ளதாக கூறியுள்ளார். இப்படப்பிடிப்பு முடிவடைந்த பின்னர் தலைவன் இருக்கிறான் என்ற படத்தில் கமல்ஹாசன் நடிக்க உள்ளார்.
அச்சமயத்தில் வேட்டையாடு விளையாடு இரண்டாம் பாகம் எடுப்பதற்கான அனைத்து வேலைகளும் தொடங்கப்படும் என எதிர்பார்ப்புகள் உள்ளன. மேலும் வேட்டையாடு விளையாடு 2 படத்தில் கமலஹாசன் ஜோடியாக நடிக்கப் போகும் நடிகை யார் என்ற கேள்வி எழுப்பியுள்ளது. இதற்கு முன்னர் நடிகை அனுஷ்கா பெயர் வெளியானது. அதனைத்தொடர்ந்து கீர்த்தி சுரேஷ் நடிக்கயிருப்பதாக தகவல்கள் வெளியாகியுள்ளன. கொரோனா ஊரடங்கு முடிந்தவுடன் இப்படத்தில் கமலஹாசனுடன் நடிக்கப்போகும் நடிகர் நடிகைகள் குறித்த விவரங்கள் அனைத்தும் தெரிய வரும் என எதிர்பார்க்கப்படுகிறது. நடிகை கீர்த்தி சுரேஷ் தற்சமயத்தில் ரஜினிகாந்த் நடிக்கின்ற அண்ணாத்த படத்தில் நடித்துக்கொண்டிருக்கிறார். தெலுங்கில் இரண்டு படங்களில் நடிப்பதற்கான வாய்ப்பையும் பெற்றுள்ளார் என்பது குறிப்பிடத்தக்கது.