உத்தரகண்ட் மாநிலத்தில் முதலமைச்சரான புஷ்கர் சிங் தாமி தலைமையிலான பாரதிய ஜனதா கட்சியின் ஆட்சி நடைபெற்று வருகிறது. இந்நிலையில் டேராடூனிலுள்ள தலைமைச் செயலகத்தில் முதலமைச்சர் தலைமையில், மாநில அமைச்சரவைக் கூட்டம் நடைபெற்றது. அப்போது அரசு ஊழியர்களின் ஊதிய உயர்வு உள்ளிட்ட பல முக்கிய விவகாரங்கள் குறித்து விவாதிக்கப்பட்டது.
அமைச்சரவைக் கூட்டத்தின் முடிவில் அரசு ஊழியர்கள் மற்றும் ஓய்வூதியதார்களுக்கு 3 % அகவிலைப்படி உயர்வை அளிக்க ஒப்புதல் வழங்கப்பட்டுள்ளது. இதன் மூலமாக 2.5 லட்சம் அரசு ஊழியர்கள் மற்றும் ஓய்வூதியதாரர்கள் பயனடைவர்.
மேலும் 10 மற்றும் 12 ஆம் வகுப்பு மாணவர்கள் டேப்லெட்டுகளை வாங்குவதற்கு, அவர்களது வங்கிக் கணக்குகளில் நேரடிப் பலன் பரிமாற்றம் (டிபிடி) மூலமாக பணத்தை டெபாசிட் செய்யவும் ஒப்புதல் அளிக்கப்பட்டு உள்ளது. இந்த திட்டத்துக்கு வருடத்துக்கு 190 கோடி ரூபாய் செலவாகும். இது தவிர 1-ம் வகுப்பு முதல் 5 ஆம் வகுப்பு வரை கர்வாலி, குமாவோனி, ஜான்சாரி, குர்முகி, பங்களா ஆகிய மொழிகளில் இரு மொழிப் புத்தகங்களை வெளியிடுவதற்கான முன்மொழிவுக்கும் மாநில அமைச்சரவை ஒப்புதல் அளித்துள்ளது.
முதல்வர் புஷ்கர் சிங் தாமி தலைமையிலான மாநில அமைச்சரவை மொத்தம் 41 திட்டங்களுக்கு ஒப்புதல் வழங்கியுள்ளது. இவ்வாறு அகவிலைப்படி உயர்வு அளிக்கப்பட்டு இருபதால் அரசு ஊழியர்கள் மற்றும் ஓய்வூதியதாரர்கள் மகிழ்ச்சி அடைந்துள்ளனர். உத்தர பிரதேச மாநிலத்தைத் தொடர்ந்து உத்தரகண்ட் மாநிலத்திலும் அகவிலைப்படி உயர்வு அளிக்கப்பட்டு இருக்கிறது. பாஜக ஆளும் இந்த 2 மாநிலங்களிலும் அடுத்த ஆண்டு சட்டப்பேரவைத் தேர்தல் நடைபெற உள்ளது குறிப்பிடத்தக்கது.