டிரைவரை தாக்கி வழிப்பறியில் ஈடுபட்ட 2 வாலிபர்களை காவல் துறையினர் கைது செய்துள்ளனர்.
தூத்துக்குடி மாவட்டத்திலுள்ள வசவபுரம் பகுதியில் சண்முக சுந்தரம் என்பவர் வசித்து வருகிறார். இவர் லாரி டிரைவராக வேலை பார்த்து வருகிறார். கடந்த 25-ஆம் தேதி சண்முக சுந்தரம் லாரியை ஓட்டி செல்வதற்கு தயாராக இருந்துள்ளார். அப்போது மோட்டார் சைக்கிளில் வந்த 2 வாலிபர்கள் சண்முக சுந்தரத்தை தாக்கிவிட்டு அவரிடம் இருந்த செல்போன், பவர் பேங்க், ஏடிஎம் கார்டு ஆகியவற்றை வாங்கி விட்டு அங்கிருந்து தப்பிச் சென்றுள்ளனர். இதனை பார்த்த அருகிலிருந்தவர்கள் கல்லால் தாக்கியதால் காயமடைந்த சண்முகசுந்தரத்தை மீட்டு தூத்துக்குடி அரசு மருத்துவமனைக்கு சிகிச்சைக்காக அனுமதித்தனர். அங்கு அவருக்கு சிகிச்சை அளிக்கப்பட்டு வருகிறது.
இதுகுறித்த புகாரின்பேரில் வழக்குப்பதிவு செய்த காவல்துறையினர் விசாரணை நடத்தி வந்தனர். இந்நிலையில் காவல்துறையினர் ரோந்து பணியில் தீவிரமாக ஈடுபட்டிருந்தனர். அப்போது மோட்டார் சைக்கிளில் சந்தேகத்திற்கிடமான வகையில் வந்த 2 வாலிபர்களை பிடித்து விசாரணை நடத்தினர். அந்த விசாரணையில் அவர்கள் தூத்துக்குடி பண்டுநகர் பகுதியில் வசிக்கும் சதீஷ், அஜித் என்பது தெரியவந்துள்ளது. மேலும் அவர்கள் லாரி டிரைவரான சண்முக சுந்தரத்தை தாக்கி வழிப்பறியில் ஈடுபட்டது தெரியவந்துள்ளது. இதனையடுத்து காவல்துறையினர் 2 பேரையும் கைது செய்ததோடு அவர்களிடமிருந்த மோட்டார் சைக்கிளையும் பறிமுதல் செய்து விசாரணை மேற்கொண்டு வருகின்றனர்.