சென்னை ஓடும் ரயிலில் கைவரிசை…வடமாநில கொள்ளையர்கள் கைது !

சென்னை சென்ட்ரல் ரயில் நிலையம் பேசின்பிரிட்ஜ் மற்றும் புறநகர் ரயில்களில் செல்லக்கூடிய பயணிகளை குறிவைத்து வடமாநில கொள்ளையர்கள் சிலர் தங்க நகைகளை கொள்ளை அடித்துச் செல்வதாக புகார் வந்தது. இதன் அடிப்படையில் ரயில்வே காவல்துறை கண்காணிப்பாளர் மகேஸ்வரன் உத்தரவின்பேரில் தனிப்படை அமைத்து கண்காணிப்பு பணி தீவிரப்படுத்தப்பட்டது.

இதில், சென்ட்ரல் ரயில் நிலையத்தில் நடைமேடை 15 அருகே சந்தேகத்தின் பேரில் நடமாடிய 5 வடமாநிலத்தவர்களை பிடித்து விசாரித்தபோது அவர்கள் முன்னுக்கு பின் முரணாக பதிலளித்தனர்.

இதனையடுத்து ஐந்து பேரையும் கடந்த 6ஆம் தேதி கைது செய்த போலீஸார், அவர்களிடம் தீவிர விசாரணை நடத்தியதில் ஓடும் ரயில்களில் பயணிகளை குறிவைத்து கொள்ளை அடிப்பவர்கள் என்று தெரியவந்தது. இதைத்தொடர்ந்து அவர்களிடமிருந்து கொள்ளையடிக்கப்பட்ட 25 சவரன் தங்க நகைகள் மீட்கப்பட்டது.

கொள்ளையர்கள் ராஜேஷ் குமார் (46), மதன்லால் (38), ராம்தியா (40), சுனில் குமார் (34), சுரேஷ்குமார் (39) ஆகிய 5 பேரும் ஜார்ஜ் டவுன் நீதிமன்றத்தில் ஆஜர்படுத்தப்பட்ட பின்னர் புழல் சிறையில் அடைக்கப்பட்டனர்.

இதன் பின்னர் போலீஸ் காவலில் எடுத்து அவர்களிடம் போலீஸார் மேலும் விசாரணை நடத்தினர். இதில், மேலும் 60 சவரன் தங்க நகைகள் அவர்களிடமிருந்து மீட்கப்பட்டது.

ரயிலில் பயணிப்பவர்களிடம் நகையை கொள்ளையடித்துவிட்டு ஆந்திராவுக்கு சென்று சொகுசு வாழ்க்கை வாழ்ந்த பின், பணம் தீர்ந்த நிலையில் மீண்டும் சென்ட்ரல் ரயில் நிலையத்தில் திருட முயன்றபோது சிக்கியுள்ளதாக இவர்கள் வாக்குமூலம் அளித்தனர்.