பெண் என்ஜினீயரை பாலியல் பலாத்காரம் செய்த வாலிபரை காவல்துறையினர் போக்சோ சட்டத்தில் கைது செய்தனர்.
திருப்பத்தூர் மாவட்டத்தில் உள்ள ஜோலார்பேட்டை எஸ்.கோடியூர் கிராமத்தில் திருக்குமரன் மகன் கோகுல் என்பவர் வசித்து வருகின்றார். இவர் வாணியம்பாடி தனியார் என்ஜினீயரிங் கல்லூரியில் பயின்றபோது அதே கல்லூரியை சேர்ந்த மாணவியை காதலித்து வந்துள்ளார். அப்போது திருமணம் செய்து கொள்வதாக ஆசை வார்த்தைகளை கூறி மாணவியிடம் உல்லாசமாக இருந்துள்ளார். எனவே தற்போது அந்த மாணவி பெங்களூரில் தனியார் கம்பெனியில் பணிபுரிந்து வருகின்றார். இந்நிலையில் அவர் தன்னை திருமணம் செய்து கொள்ளுமாறு கோகுலிடம் கேட்டதற்கு அவர் மறுத்துவிட்டார்.
இதனையடுத்து கோகுல் வீட்டிற்கு சென்று நடந்ததை கூறியதற்கு கோகுலின் தந்தை திருக்குமரன், தாய் செல்வி இருவரும் எங்கள் வீட்டிற்கு வந்தால் உணவில் விஷம் வைத்து கொன்று விடுவோம் என்று மாணவிக்கு கொலை மிரட்டல் விடுத்துள்ளனர். அதன்பின் அதே கிராமத்தை சேர்ந்த கோகுலின் நண்பர்கள் பூபாலன், அரவிந்தன், பாலா ஆகிய 3 பேரும் சேர்ந்து மாணவியை மிரட்டியுள்ளனர். இதுகுறித்து அனைத்து மகளிர் காவல் நிலையத்தில் கொடுக்கப்பட்ட புகாரின் பேரில் துணை போலீஸ் சூப்பிரண்டு சாந்தலிங்கம் விசாரணை மேற்கொண்டு கோகுல் மீது போக்சோ சட்டத்தில் வழக்குப்பதிவு செய்து அவரை கைது செய்தார். மேலும் தலைமறைவாக இருக்கின்ற 5 பேரை காவல்துறையினர் வலைவீசி தேடி வருகின்றனர்.