பாராளுமன்ற தேர்தல் 7 கட்டங்ககளாக அறிவிக்கப்பட்டு நேற்று கடைசியாக 7வது கட்ட தேர்தல் நடந்து முடிந்த நிலையில் வார வர்த்தகத்தின் முதல் நாளான இன்று, இந்தியப் பங்குச் சந்தை உயர்வுடன் தொடங்கின. தேர்தலுக்கு பின் நடத்தப்பட்ட கருத்துக்கணிப்புகள் நேற்று வெளியான நிலையில், 2014 ஆம் ஆண்டைப் போலவே பா.ஜ.க அதிக தொகுதிகளை கைப்பற்றி மீண்டும் ஆட்சியமைக்கும் என்று தெரிவிக்கப்பட்டுள்ளது.
இதன் எதிரொலியாக இன்று காலையில் சென்செக்ஸ் 950 புள்ளிகள் வரை ஏற்றம் கண்டது. இன்றைய தின வர்த்தகத்தின் தொடக்கத்திலேயே சென்செக்ஸ் 962.12 புள்ளிகள் உயர்ந்து , 38,892.89 புள்ளிகளிலும், நிஃப்டி 286.95 புள்ளிகள் அதிகரித்து , 11,694.10 புள்ளிகளிலும் வர்த்தகமாகியது. இந்த நிலையில் மும்பை பங்கு சந்தையில் சென்செக்ஸ் குறியீடு 1,421.90 புள்ளிகள் உயர்ந்து 39,352 புள்ளிகளாக நிறைவடைந்துள்ளது. இதே போல நிஃப்டி குறியீடு 421.10 புள்ளிகள் உயர்ந்து 11,828 புள்ளிகளாக முடிவடைந்துள்ளது.
