விஷ வண்டு கடித்ததில் தந்தை பலியாகி மகன் படுகாயம் அடைந்த சம்பவம் சோகத்தை ஏற்படுத்தியுள்ளது.
தென்காசி மாவட்டத்திலுள்ள பொட்டலூர் பகுதியில் விவசாயியான தங்க நாடார் என்பவர் தனது குடும்பத்துடன் வசித்து வந்துள்ளார். இவருக்கு மாரிமுத்து என்ற மகன் இருக்கின்றார். இந்நிலையில் தங்க நாடாரும், மாரிமுத்தும் இணைந்து தங்களின் மாட்டு தொழுவத்தை சுத்தம் செய்து கொண்டிருந்த போது அங்குள்ள கோழிக்கொண்டை எடுத்து உள்ளனர். அப்போது அதிலிருந்த சில விஷ வண்டுகள் திடீரென பறந்து சென்று தங்க நாடாரையும், மாரிமுத்துவையும், கடித்து விட்டதால் அவர்கள் இருவருக்கும் காயம் ஏற்பட்டு அங்கேயே மயங்கி கீழே விழுந்து விட்டனர்.
இதனையடுத்து அவர்களின் குடும்பத்தினர் தங்க நாடாரும், மாரிமுத்துவும், மயங்கிக் கீழே கிடந்ததை பார்த்து அதிர்ச்சி அடைந்து உடனடியாக அவர்களை மீட்டு சிகிச்சைக்காக அரசு மருத்துவமனையில் அனுமதித்துள்ளனர். ஆனால் அங்கு தங்க நாடாருக்கு அளிக்கப்பட்ட சிகிச்சை பலனின்றி அவர் பரிதாபமாக உயிரிழந்து விட்டார். அங்கு மாரிமுத்துவிற்கு தீவிர சிகிச்சை அளித்து வருகின்றனர். இதுகுறித்து தகவலறிந்த காவல்துறையினர் மருத்துவமனைக்கு விரைந்து சென்று தங்க நாடாரின் உடலை கைப்பற்றி உடற்கூறு ஆய்வுக்காக அனுப்பி வைத்துள்ளனர். மேலும் இச்சம்பவம் குறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.