குடும்பத்துடன் காவிரி ஆற்றில் குளிக்க சென்றபோது தொழிலாளி ஆற்றில் மூழ்கி உயிரிழந்த சம்பவம் அவரது குடும்பத்தினரிடையே சோகத்தை ஏற்படுத்தியுள்ளது.
நாமக்கல் மாவட்டம் எருமப்பட்டி அடுத்துள்ள பொட்டிரெட்டிபட்டியில் பாலசுப்பிரமணியம்(46) என்பவர் அவரது மனைவி செல்வி, மகன் மற்றும் 2 மகள்களுடன் வசித்து வந்துள்ளார். இவர் கூழிதொழிலாளியாக வேலை பார்த்து வந்துள்ளார். இந்நிலையில் பாலசுப்பிரமணியம் தனது குடும்பத்தினருடன் மணக்காடு பகுதியில் உள்ள உறவினர் வீட்டிற்கு ஆடிப்பெருக்கை கொண்டாட சென்றுள்ளார்.
அப்போது அப்பகுதியில் உள்ள காவிரி ஆற்றில் குளிப்பதற்காக 5 பேரும் சென்றுள்ளனர். இதனையடுத்து பாலசுப்பிரமணியம் குளித்துகொண்டிருக்கும் போது திடீரென ஆற்றில் மூழ்கியுள்ளார். இதனை பார்த்து அதிர்ச்சியடைந்த அவரது மனைவி மற்றும் பிள்ளைகள் அவரை காப்பாற்ற முயன்றுள்ளனர். ஆனால் தண்ணீரில் மூழ்கிய பாலசுப்பிரமணியனை கண்டுபிடிக்க முடியவில்லை. இதனைதொடர்ந்து அவரது மனைவி செல்வி காவல்நிலையத்தில் புகார் அளித்த நிலையில் மொளசி காவல்துறையினர் ஆற்றில் மாயமான தொழிலாளியை தேடி வந்துள்ளார்.
மேலும் நேற்று காலையில் அதே பகுதியில் உள்ள ஆற்றில் பாலசுப்பிரமணியனின் உடல் கரை ஒதுங்கியதாக காவல்துறையினருக்கு தகவல் கிடைத்துள்ளது. அந்த தகவலின் அடிப்படையில் சம்பவ இடத்திற்கு சென்ற சப்-இன்ஸ்பெக்டர் சதாசிவம் மற்றும் காவல்துறையினர் பாலசுப்பிரமணியனின் உடலை மீட்டு பிரேத பரிசோதனைக்காக திருச்செங்கோடு மருத்துவமனைக்கு அனுப்பி வைத்துள்ளனர். இதுகுறித்து வழக்கு பதிவு செய்து தொடர்ந்து விசாரணை நடத்தி வருகின்றனர்.