குளத்தில் பாய்ந்த ஆட்டோ…. தொழிலாளிக்கு நேர்ந்த விபரீதம்…. வேதனையில் குடும்பத்தினர்….!!

ஆட்டோ கவிழ்ந்த விபத்தில் தொழிலாளி உயிரிழந்த சம்பவம் சோகத்தை ஏற்படுத்தியுள்ளது.

தூத்துக்குடி மாவட்டத்திலுள்ள வெள்ளூர் பகுதியில் கண்ணன் என்பவர் வசித்து வருகிறார். இவருக்கு சொர்ணபாண்டியன் என்ற மகன் இருந்துள்ளார். இவர் கூலி வேலை செய்து வந்துள்ளார். இவருக்கு ஆனந்தி என்ற மனைவியும், திருநீலகண்டர் என்ற மகனும் உள்ளனர். இந்நிலையில் சொர்ணபாண்டியன் அப்பகுதியில் வசிக்கும் தனது உறவினருடைய ஆட்டோவை ஓட்டி சென்றுள்ளார். அந்த ஆட்டோவில் தனது உறவினர்களான அதே ஊரில் வசிக்கும் ராமர், மந்திரமூர்த்தி ஆகியோரையும் அழைத்துச் சென்றுள்ளார்.

இந்நிலையில் வெள்ளூர் கஸ்பா குளம் அருகில் சென்று கொண்டிருந்தபோது எதிர்பாராத விதமாக ஆட்டோ நிலைதடுமாறி குளத்தில் கவிழ்ந்தது. இதில் ஆட்டோவில் சிக்கி பலத்தகாயமடைந்த சொர்ணபாண்டியனை ராமரும், மந்திரமூர்த்தியும் அக்கம்பக்கத்தினர் உதவியுடன் மீட்டு ஸ்ரீவைகுண்டம் அரசு மருத்துவமனைக்கு சிகிச்சைக்காக கொண்டு சென்றனர். ஆனால் சொர்ணபாண்டியனை பரிசோதனை செய்த மருத்துவர்கள் அவர் ஏற்கனவே இறந்துவிட்டதாக தெரிவித்துள்ளனர். மேலும் இதுகுறித்து வழக்கு பதிவு செய்த ஸ்ரீவைகுண்டம் காவல்துறையினர் விசாரணை மேற்கொண்டு வருகின்றனர்.