தெலுங்கு சினிமாவில் கிருஷ்ணர் வேடத்தில் அதிக அளவில் நடித்து ஆந்திர மாநில மக்களால் கிருஷ்ணராகவே கொண்டாடப்பட்டவர் பழம்பெரும் நடிகர் என்டி ராமராவ். இவர் ஆந்திர மாநிலத்தின் முதல்வராக 3 முறை பதவி வகித்துள்ளார். இவருடைய நூற்றாண்டு விழா தற்போது ஆந்திரா மற்றும் தெலுங்கானா மாநிலங்களில் கொண்டாடப்பட்டு வருகிறது. அதில் ஒரு பகுதியாக அமெரிக்காவில் என்டி ராமராவின் திருவுருவ சிலை அமைக்கப்பட இருக்கிறது.
அதாவது அமெரிக்காவில் வசிக்கும் இந்திய தொழில் அதிபரும், தயாரிப்பாளருமான டி.ஜி விஷ்வ பிரசாத் என்டி ராமராவின் திருவுருவ சிலையை அமெரிக்காவில் உள்ள நியூ ஜெர்சி மாகாணத்தின் எடிசன் நகரில் அமைப்பதற்கான ஏற்பாடுகளை செய்து வந்தார். இந்த சிலையை அமைப்பதற்கு எடிசன் நகர் மேயர் சாம் ஜோஷி அனுமதி கொடுத்துள்ளார். இவர் இந்திய வம்சாவளியைச் சேர்ந்த முதல் மேயர் ஆவார். மேலும் அமெரிக்காவில் என்டி ராமராவின் திருவுருவ சிலை வைக்கப்படுவதை அவருடைய ரசிகர்கள் கொண்டாடி வருகிறார்கள்.