அமெரிக்க அதிபர் ஜோ பைடன், ரஷ்ய ஜனாதிபதி புடினை இன்று ஜெனீவாவில் சந்திக்க உள்ள நிலையில் அவர்கள் எதைப் பற்றி பேச உள்ளார்கள் என்பது குறித்த பரபரப்பு தகவல்கள் வெளியாகியுள்ளது.
அமெரிக்க அதிபர் ஜோ பைடனும், ரஷ்ய அதிபர் புடினும் சுவிட்சர்லாந்தின் ஜெனீவா நகரில் உள்ள Villa La Grange-ல் இன்று சந்திக்க உள்ள நிலையில் சுமார் 5 மணி நேரம் மூன்று கட்டமாக இடைவெளியுடன் இந்த பேச்சுவார்த்தை நடைபெறும் என்று தகவல்கள் தெரிவிக்கப்பட்டுள்ளது. இவர்களுடைய இந்த சந்திப்பிற்கு பிறகு ரஷ்ய ஜனாதிபதி புடின் செய்தியாளர்களை தனியாக சந்தித்து பேசுவார் என்றும் கூறப்படுகிறது. அதனை தொடர்ந்து அமெரிக்க அதிபர் ஜோ பைடனும் செய்தியாளர்களை தனியாக சந்தித்து பேச உள்ளார். ஆனால் இவர்கள் இருவரும் சேர்ந்து ஒன்றாக செய்தியாளர்கள் சந்திப்பில் பேச போவதில்லை என்றும் தெரிவிக்கப்பட்டுள்ளது.
சைபர் கிரைம், கொரோனாவுக்கு எதிரான போராட்டம், தகவல் பாதுகாப்பு, காலநிலை மாற்றம் உள்ளிட்டவை குறித்து இரு நாட்டு தலைவர்களும் பேச உள்ளதாக தகவல்கள் வெளியாகியுள்ளது. மேலும் ஈரானிய அணுசக்தி திட்டம், சிரியா, ஆப்கானிஸ்தான், லிபியா, மத்திய கிழக்கு, கொரிய தீபகற்பத்தின் நிலைமைகள் குறித்தும் இரு ஜனாதிபதிகளும் பேச உள்ளதாக கூறப்படுகிறது. அதில் பெலாரஸ் மற்றும் நகோரனோ-கரபக்ஹ் குறித்து இந்த பேச்சுவார்த்தையில் சிறப்பு கவனம் செலுத்த திட்டமிட்டுள்ளதாக தெரிவிக்கப்பட்டுள்ளது.