அரையாண்டு விடுமுறையில் சிறப்பு வகுப்புகள் நடத்தக்கூடாது என பள்ளி கல்வித்துறை அறிவுறுத்தியுள்ளது.
தமிழகத்தில் 9 முதல் 12ஆம் வகுப்பு வரை உள்ள மாணவர்களுக்கு அரையாண்டு தேர்வு கடந்த டிசம்பர் 16ஆம் தேதி தொடங்கிய நிலையில் இன்றுடன் (23ஆம் தேதி) முடிவடைகிறது. அதே போல 1 முதல் 8ஆம் வகுப்பு வரை உள்ள மாணவர்களுக்கு கடந்த 19ஆம் தேதி தொடங்கிய நிலையில், இன்றுடன் முடிவடைகிறது. இதனை தொடர்ந்து நாளை (24ஆம் தேதி) முதல் ஜனவரி 1ஆம் தேதி புத்தாண்டு வரை மாணவர்களுக்கு விடுமுறை அளிக்கப்பட்டுள்ளது. அதன் பின் மீண்டும் ஜனவரி 2ஆம் தேதி பள்ளிகள் திறக்கப்பட உள்ளது.
இந்நிலையில் அரையாண்டு விடுமுறையில் சிறப்பு வகுப்புகள் நடத்தக்கூடாது என பள்ளி கல்வித்துறை அறிவுறுத்தியுள்ளது. பொதுத்தேர்வை எதிர்கொள்ளும் மாணவர்களுக்கு அசைன்மென்ட்களை மட்டும் வழங்கலாம் எனவும் பள்ளி கல்வித்துறை தெரிவித்துள்ளது. விடுமுறை பற்றி அனைத்து மாவட்ட முதன்மை கல்வி அலுவலர்களுக்கு பள்ளிக்கல்வித்துறை உத்தரவிட்டுள்ளது.