லைக்கா புரொடக்ஷன் தயாரிப்பில் பிரமாண்டமாக உருவாகிவரும் ‘இந்தியன் 2’ படத்தை இயக்குனர் ஷங்கர் இயக்குகிறார். இப்படத்தில் கமல் ஹாசன், காஜல் அகர்வால், பாபி சிம்ஹா, யோகிபாபு உள்ளிட்ட முக்கிய பிரபலங்கள் நடித்து வருகின்றனர். ‘இந்தியன் 2’ படத்தின் முதல்கட்ட படப்பிடிப்பு சென்னையில் தொடங்கி நடைபெற்று வருகிறது. அதை தொடர்ந்து ஆந்திர மாநிலம் விசாகப்பட்டினம், மத்தியப் பிரதேசம் மாநிலம் போபால் ஆகிய இடங்களில் நடைபெற்றது. இதன் பின்னர் குவாலியர் நகரில் படத்தின் முக்கிய காட்சிகள் படமாக்கப்பட்டன. அதை தொடர்ந்து ராஜஸ்தான் மாநிலம் ஆஜ்மீர் நகரில் ஷுட்டிங் நடைபெற்றது.
இந்தநிலையில் தற்போது சென்னை பூந்தமல்லி அடுத்த நசரத்பேட்டையில் உள்ள இ.வி.பி படப்பிடிப்பு தளத்தில் ‘இந்தியன் 2’ படத்திற்கு செட் அமைக்கும் பணி நடைபெற்ற போது கிரேன் அறுந்து விழுந்து விபத்து ஏற்பட்டுள்ளது. இதில் சண்டை கலைஞர்கள் 3 பேர் பரிதாபமாக உயிரிழந்தனர். மேலும் 10-க்கும் மேற்பட்டோர் காயமடைந்து மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.
இதனால் செட் அமைக்கும் பணி நிறுத்தப்பட்டுள்ளது. இந்த பணியில் 50-க்கும் மேற்பட்டோர் ஈடுபட்டதாக சொல்லப்படுகிறது. இந்த சம்பவம் குறித்து சம்பவ இடத்திற்கு வந்த நசரத் பேட்டை போலீசார் விசாரணை நடத்தி வருகின்றனர். படப்பிடிப்பு தளத்தில் நடிகர் கமல் ஹாசனும் இருந்துள்ளார்.