தமிழகத்தில் நகர்ப்புற உள்ளாட்சி தேர்தலில் பதிவான வாக்குகள் எண்ணப்பட்டு, இன்று முடிவுகள் அறிவிப்பு. மின்னணு வாக்குபதிவு எந்திரங்களில் பதிவான வாக்குகள் காலை 8 மணி முதல், 268 மையங்களில் எண்ணப்படுகின்றன. சென்னையில் 3 அடுக்கு போலீஸ் பாதுகாப்புடன் 15 மையங்களில் வாக்கு எண்ணிக்கை தொடங்கி, அறிவிக்கப்பட்டு வருகின்றது.
தமிழகத்தில் 648 நகர்ப்புற உள்ளாட்சி அமைப்புகளுக்கு நடந்த தேர்தலில் 60.70 சதவீத வாக்குகள் பதிவாகின. வாக்கு எண்ணும் மையங்களில் 40 ஆயிரத்து 910 காவலர்கள் பாதுகாப்பு பணியில் ஈடுபட்டுள்ளனர். வாக்கு எண்ணிக்கை முடிந்தபின் பிரச்சனைகள் ஏற்படாமல் தடுக்க 60 ஆயிரம் போலீசார் கண்காணிப்பில் ஈடுபட்டவுள்ளனர். வாக்கு எண்ணிக்கை மையங்களில் 11 ஆயிரத்து 797 சிசிடிவி கேமராக்கள் கண்காணிக்கின்றன.
இந்த நிலையில் திருவாரூர் பேரளம் பேரூராட்சியில் 1வது வார்டில் மார்க்சிஸ்ட், இரண்டாவது வார்டில் திமுக வெற்றி பெற்றுள்ளது. திருச்சி துவாக்குடி நகராட்சி 2- வது வார்டில் திமுகவின் ஸ்டீபன்ராஜ் 338 வாக்குப் பெற்று வெற்றி பெற்றுள்ளார். 3வது வார்டில் மதிமுகவின் மோகன் பெரியகருப்பன் 290 வாக்கு பெற்று வெற்றி பெற்றுள்ளார். நெல்லை களக்காடு நகராட்சி 2-வது வார்டில் சுயேச்சை, 3வது வார்டில் அதிமுக வெற்றி பெற்றுள்ளது.