தமிழகத்தின் நீலகிரி மாவட்டம் குன்னூர் அருகே காட்டேரி பகுதியில் நேற்று முன்தினம் நடந்த ஹெலிகாப்டர் விபத்தில் முப்படை தலைமை தளபதி பிபின் ராவத், அவரது மனைவி மதுலிகா ராவத் உள்ளிட்ட 13 பேர் மரணமடைந்தனர்.. இதில் குரூப் கேப்டன் வருண் சிங் மட்டும் பெங்களூரு விமானப்படை மருத்துவமனையில் சிகிச்சை பெற்று வருகின்றார்.. முப்படை தலைமை தளபதி பிபின் ராவத் உட்பட 13 பேரின் உடல்களும் நேற்று வெலிங்டன் ராணுவ பயிற்சி கல்லூரி மைதானத்தில் வைக்கப்பட்டது. தமிழக முதல்வர் மு.க ஸ்டாலின் மற்றும் அமைச்சர்கள் உள்ளிட்டோர் பிபின் ராவத் உட்பட 13 பேரின் உடலுக்கு அஞ்சலி செலுத்தினர்..
அதனை தொடர்ந்து 13 பேரின் உடல்களும், தனித்தனி ஆம்புலன்ஸ் மூலம் சூலூர் விமானப்படை தளத்திற்கு கொண்டு வரப்பட்டு, அங்கிருந்து நேற்று இரவு 8 மணியளவில் டெல்லி பாலம் விமான நிலையத்துக்கு கொண்டு வரப்பட்டது.. அங்கு பிரதமர் மோடி, பாதுகாப்புத்துறை அமைச்சர் ராஜ்நாத் சிங், பாதுகாப்புத் துறை ஆலோசகர் அஜித் தோவல் மற்றும் முப்படை தளபதிகள் உள்ளிட்டோர் அஞ்சலி செலுத்தினர்..
மேலும் பிபின் ராவத்தின் மகள்கள் இருவரும் கண்ணீர் மல்க அஞ்சலி செலுத்தினர்.. இதையடுத்து இன்று காலை உள்துறை அமைச்சர் அமித் ஷா, நிதியமைச்சர் நிர்மலா சீதாராமன், காங்கிரஸ் முன்னாள் தலைவர் ராகுல் காந்தி, திமுக எம்பிக்கள் உள்ளிட்டோர் பிபின் ராவத் மற்றும் அவரது மனைவி மதுலிகா ராவத் உடலுக்கு அஞ்சலி செலுத்தினர். அதேபோல பிபின் ராவத்தின் இல்லத்தில் காலை 11 மணி முதல் 12 : 30 மணி வரை பொதுமக்களும், 12:30 மணி முதல் 1:30 மணி வரை ராணுவ அதிகாரிகள் அஞ்சலி செலுத்தினர்..
இதையடுத்து தலைமை தளபதி பிபின் ராவத் அவரது மனைவி மதுலிகா ராவத் இறுதி ஊர்வலம் நடைபெற்றது. காமராஜ் மார்க் வழியாக டெல்லி கன்டோன்மென்ட் மயானத்துக்கு ஊர்வலமாக எடுத்துச் செல்லப்பட்டது. இறுதி ஊர்வலத்தில் வழிநெடுகிலும் ஆயிரக்கணக்கான மக்கள் மலர்தூவி, தேசியக் கொடியை கையில் ஏந்தியவாறு முழக்கம் எழுப்பி அஞ்சலி செலுத்தினர்..
இந்நிலையில் ராணுவ தளபதி எம்.எம்.நரவானே, விமானப்படை தளபதி வி.ஆர்.சவுத்ரி மற்றும் கடற்படை தளபதி ஹரி குமார், இந்தியாவுக்கான பிரான்ஸ் தூதர் இம்மானுவேல் லெனைன், பிரிட்டிஷ் உயர் அதிகாரி அலெக்ஸ் எல்லிஸ் ஆகியோர் முப்படைத் தலைமை தளபதி பிபின் ராவத் உடலுக்கு இறுதி மரியாதை செலுத்தி வருகின்றனர்.