தமிழகத்தில் தனியார் பேருந்துகள் மக்களிடம் மூன்று மடங்கிற்கு மேல் கட்டணம் வசூலிப்பது அதிர்ச்சியை ஏற்படுத்தியுள்ளது.
தமிழகத்தில் கொரோனா அச்சுறுத்தல் காரணமாக கடந்த மார்ச் மாதம் ஊரடங்கு அமல்படுத்தப்பட்டது. அப்போது பலத்த கட்டுப்பாடுகள் விதிக்கப்பட்டன. அதிலும் குறிப்பாக போக்குவரத்து சேவை முற்றிலும் முடக்கப்பட்டது. அதனால் மக்கள் அனைவரும் தங்கள் வீட்டிலேயே முடங்கி கிடந்தனர். அதன்பிறகு கொரோனா பாதிப்பு குறைந்து வரும் நிலையில், ஊரடங்கு தளர்வு களை தமிழக அரசு அறிவித்து வருகிறது. அதன் முக்கிய பகுதியாக போக்குவரத்து சேவை மீண்டும் இயக்கப்பட்டுள்ளது. இருந்தாலும் குறைந்த அளவிலான பேருந்துகள் மட்டுமே இயக்கப்பட்டு வருகின்றன.
இந்நிலையில் ஊதிய உயர்வு மற்றும் பணி ஓய்வு பணப்பயன் உள்ளிட்ட கோரிக்கைகளை வலியுறுத்தி தமிழகம் முழுவதும் அரசு பேருந்து ஊழியர்கள் 23 நாட்களாக வேலைநிறுத்தப் போராட்டத்தில் ஈடுபட்டு வருகின்றனர். அதனால் பெரும்பாலான இடங்களில் 2 நாட்களாக பேருந்துகள் எதுவும் ஓடவில்லை. அதனால் பொதுமக்கள் அனைவரும் மிகவும் அவதிப்பட்டனர்.
இதனையடுத்து தமிழகம் முழுவதும் 3வது நாளாக அரசு பேருந்து ஊழியர்கள் வேலைநிறுத்தப் போராட்டத்தில் ஈடுபட்டுள்ளனர். ஓய்வூதியதாரர்களுக்கு பணப்பலன், 14 வது ஊதிய உயர்வு ஒப்பந்த பேச்சுவார்த்தையை தொடங்க கோரி அரசு ஊழியர்கள் வேலைநிறுத்தப் போராட்டத்தில் ஈடுபட்டுள்ளனர். பேருந்துகள் வழக்கத்தை விட மிகக் குறைந்த அளவில் இயக்கப்படுவதால் பல மாவட்டங்களில் மக்கள் பாதிக்கப்பட்டுள்ளனர்.
இதனை பயன்படுத்திக் கொண்ட தனியார் பேருந்துகள் மக்களிடம் கொள்ளை அடிக்க ஆரம்பித்துள்ளனர். திருச்சியில் இருந்து புதுக்கோட்டை செல்லும் தனியார் பேருந்துகளில் மூன்று மடங்கிற்கு மேல் கட்டணம் வசூல் செய்யப்படுகிறது அதிர்ச்சியை ஏற்படுத்தியுள்ளது. அரசுப் பேருந்துகளில் 37 ரூபாய் கட்டணம் நிர்ணயிக்கப் பட்டுள்ள நிலையில், தனியார் பேருந்துகளில் 100 ரூபாய் முதல் 150 ரூபாய் வரை கட்டணம் வசூலிக்கப்பட்டு வருகிறது.