தமிழகத்தில் நாளை முதல் ஊரடங்கு முறையாக அமல்படுத்துவதை உறுதி செய்யவேண்டும் என்று முதல்வர் ஸ்டாலின் உத்தரவிட்டுள்ளார்.
தமிழகத்தில் கடந்த மாதத்திலிருந்து கொரோனா தொற்றின் இரண்டாம் அலை தீவிரமாக பரவி வருகிறது. இவற்றை கட்டுப்படுத்துவதற்கு தமிழக அரசு பல்வேறு நடவடிக்கைகளை மேற்கொண்டு வருகின்றது. ஏற்கனவே இரவு நேர ஊரடங்கு மற்றும் ஞாயிற்றுக்கிழமைகளில் முழு ஊரடங்கு என்ற கட்டுப்பாடுகளை அறிவித்திருந்தது. இதைத்தொடர்ந்து தமிழகத்தில் மே 10ஆம் தேதி முதல் 24ஆம் தேதி வரை முழு ஊரடங்கு அமலில் இருக்கும் என்ற அறிவிப்பையும் வெளியிட்டுள்ளது.
இந்நிலையில் இன்று முதல்வர் மு .க ஸ்டாலின் தலைமையில் நடந்த அமைச்சரவை கூட்டத்தில் 6 முடிவுகள் எடுக்கப்பட்டது. அதாவது ஊரடங்கு முறையாக அமல்படுத்துவதை உறுதிப்படுத்த வேண்டும். அனைத்து மருத்துவமனைகளிலும் ஆக்சிஜன் கையிருப்பை உறுதி செய்ய வேண்டும். எந்த காரணத்தைக் கொண்டும் மருத்துவ ஆக்ஸிஜன் வீணாக அனுமதிக்கக்கூடாது. ரெம்டெசிவர் மருந்து தட்டுப்பாடின்றி கிடைப்பதை உறுதி செய்ய வேண்டும் என்று அமைச்சர்களுக்கு அறிவுறுத்தியுள்ளார்.