பிரிட்டன் நாட்டை சேர்ந்த வீரர் ரஷ்ய படைகளிடம் சரணடைந்த நிலையில் அவரை மனிதாபிமானத்தோடு நடத்த வேண்டும் என்று அவரின் குடும்பத்தினர் ரஷ்ய அதிபருக்கு கோரிக்கை வைத்திருக்கிறார்கள்.
உக்ரைன் நாட்டில் ரஷ்ய படைகளை எதிர்த்து போராடிய 28 வயதுடைய பிரிட்டன் நாட்டைச் சேர்ந்த ஐடன் அஸ்லின் என்ற வீரர் கடந்த 2018 ஆம் வருடத்தில் உக்ரைன் நாட்டைச் சேர்ந்த ஒரு பெண்ணை காதலித்திருக்கிறார். அவருடன் சேர்ந்து வாழ்வதற்காக அந்நாட்டிற்கு சென்று தற்போது ரஷ்ய படைகளை எதிர்த்து மரியுபோல் நகரில் போரிட்டு கொண்டிருக்கிறார்.
இந்நிலையில் அவரிடம் உணவும் வெடிமருந்துகளும் கைவசம் இல்லாமல் போனதால் ரஷ்ய படைகளிடம் சரணடைய வேண்டிய நிலை ஏற்பட்டிருக்கிறது. இச்சம்பவம் நடப்பதற்கு சில மணி நேரங்களுக்கு முன்பாக அவர் பிரிட்டனில் இருக்கும் தன் குடும்பத்தினருடன் தொலைபேசியில் பேசியிருக்கிறார்.
அப்போது தனக்கு ஏற்பட்ட இக்கட்டான சூழ்நிலை குறித்து கூறியிருக்கிறார். இதுபற்றி அவரின் சகோதரர் தெரிவித்திருப்பதாவது, எனது சகோதரர் குறித்து ரஷ்ய நாட்டிடம் கெஞ்சி கேட்பதை தவிர வேறு வழி இல்லை. அவரை மனிதாபிமானத்தோடு நடத்த வேண்டும் என்ற கோரிக்கையை வைத்து கொள்கிறோம் என்று குறிப்பிட்டிருக்கிறார். ஐடன் அஸ்லின் 10 மாதங்களாக ஐஎஸ் பயங்கரவாதிகளுக்கு எதிராக ஈராக் நாட்டில் போராடியவர் என்பது குறிப்பிடத்தக்கது.