தேயிலைத் தோட்டப் பகுதியில் உடல் நலம் பாதித்த காட்டெருமைக்கு வனத்துறையினர் சிகிச்சை அளித்து வருகின்றனர்.
கோயம்புத்தூர் மாவட்டத்திலுள்ள வால்பாறை பகுதியில் இருக்கும் தேயிலைத் தோட்டங்களில் காட்டெருமைகள் நடமாட்டம் அதிகமாக காணப்படுகிறது. இந்நிலையில் வனத்துறையினர் புதுக்காடு 23-ஆம் நம்பர் தேயிலைத் தோட்டப் பகுதியில் தீவிர ரோந்து பணியில் ஈடுபட்டுக் கொண்டிருந்த போது நடக்க முடியாமல் காட்டெருமை ஒன்று படுத்துக் கிடப்பதை பார்த்துள்ளனர். இது குறித்து உயரதிகாரிகளுக்கு தகவல் தெரிவிக்கப்பட்டுள்ளது.
அந்த தகவலின் படி அதிகாரிகள் மற்றும் வால்பாறை அரசு கால்நடை மருத்துவர் மெய்யரசன் போன்றோர் சம்பவ இடத்திற்கு விரைந்து சென்று காட்டெருமைக்கு சிகிச்சை அளித்துள்ளனர். இதுகுறித்து வனத்துறையினர் கூறும் போது உடல்நலக்குறைவு ஏற்பட்டதால் காட்டெருமை நடக்க முடியாமல் படுத்து கிடப்பதாகவும், அதற்கு உரிய சிகிச்சை அளிக்கப்பட்டு வருவதாகவும் தெரிவித்துள்ளனர். மேலும் அந்த காட்டெருமையின் உடல்நலம் தீவிரமாக கண்காணிக்கப்பட்டு வருவதாக வனத்துறையினர் தெரிவித்துள்ளனர்.