தெலுங்கானா மாநிலம் சித்திப்பேட்டில் ஒரு கூட்டம் நடைபெற்றது. இந்த கூட்டத்தில் தொழிலாளர் நலத்துறை மந்திரி மல்லா ரெட்டி கலந்து கொண்டு பேசினார். அவர் பேசியதாவது, நம்முடைய முதல்வர் சந்திரசேகர் ராவ் வருகிற 2024-ம் ஆண்டு தேர்தலில் மத்தியில் ஆட்சி அமைப்பார். அவர் ஆட்சியில் அமர்ந்தவுடன் நாடு முழுவதும் வருமான வரி தளர்த்தப்படும். அதன்பின் வருமான வரி சோதனை என்பதே இருக்காது.
ஒவ்வொருவரும் தங்களால் முடிந்த அளவுக்கு வரி செலுத்தலாம். தங்களால் முடிந்த அளவுக்கு வரி செலுத்தும் முறையை சந்திரசேகர் ராவ் அறிமுகப்படுத்துவார். அதற்கு நாட்டில் மாற்றம் வர வேண்டும் என்று கூறினார். இந்நிலையில் கடந்த வாரம் மல்லா ரெட்டி மற்றும் அவருடைய குடும்பத்தினர், உறவினர்களின் வீட்டில் வருமான வரித்துறையினர் சோதனை நடத்தினர். மேலும் இந்த வருமானவரித்துறை சோதனையை மனதில் வைத்துக்கொண்டு தான் மல்லா ரெட்டி அப்படி பேசியதாக கூறப்படுகிறது.