ஓட்டுநரின் கவனத்தை திசை திருப்பி நூதன முறையில் கார்களை கடத்தி சென்று விற்பனை செய்த சம்பவம் பரபரப்பை ஏற்படுத்தியுள்ளது.
சென்னை மாவட்டத்திலுள்ள நசரத்பேட்டை மற்றும் கோயம்பேடு போன்ற பகுதிகளில் செல்போன் செயலி மூலம் வாடகை காரை பதிவு செய்கின்றனர். அதன்பின் மர்ம கும்பல் ஒன்று கார் ஓட்டுனரின் கவனத்தை திசை திருப்பி காரை கடத்தி செல்வதாக புகார்கள் வந்துள்ளது. இந்நிலையில் தனிப்படை காவல்துறையினர் அம்பத்தூர் துணை கமிஷனரின் உத்தரவின்படி கார் கடத்தும் கும்பலை தேடி வந்துள்ளனர். இதனை அடுத்து தனிப்படை காவல்துறையினர் தூத்துக்குடி மாவட்டத்தில் வசித்து வரும் கார்த்திக், குலோத்துங்கன், மருத பாண்டி மற்றும் பிரேம்குமார் போன்ற நான்கு பேரை கைது செய்து விசாரணை நடத்தியுள்ளனர். அந்த விசாரணையில் பல திடுக்கிடும் தகவல்கள் தெரிய வந்துள்ளது.
அதாவது இவர்கள் செல்போன் செயலி மூலம் சென்னை சென்ட்ரலில் இருந்து வாடகை காரை பதிவு செய்கின்றனர். அதன் பின் காரில் பயணம் செய்து கொண்டிருக்கும் போது ஒதுக்குப்புறமாக இருக்கும் மதுபான கடையின் முன்பு காரை நிறுத்த கூறுகிறார்கள். இதனையடுத்து கார் ஓட்டுனரிடம் பேசி அவரை மதுபானம் வாங்கி வருமாறு பணத்தை கொடுத்து அனுப்புகின்றனர். இவ்வாறு மதுபானம் வாங்குவதற்காக சென்ற ஓட்டுநர்கள் திரும்பி வந்து பார்ப்பதற்குள் அந்த காரை அங்கிருந்து கடத்தி செல்கின்றனர். மேலும் அந்த கடத்தல் காரின் பதிவு எண்களை மாற்றி வேறு ஒருவருக்கு விற்பனை செய்துள்ளனர். இவ்வாறு நூதன முறையில் கார்களை கடத்தி விற்பனை செய்த சம்பவம் பரபரப்பை ஏற்படுத்தி உள்ளது. இது வரை அவர்களிடம் இருந்து மூன்று கார்கள் பறிமுதல் செய்யப்பட்டுள்ளது.