கார் டிராக்டர் மீது மோதிய விபத்தில் டிரைவர் உயிரிழந்த சம்பவம் சோகத்தை ஏற்படுத்தியுள்ளது.
திருப்பத்தூர் மாவட்டத்தில் உள்ள மின்னூர் பகுதியில் முருகன் என்பவர் வசித்து வந்துள்ளார். இவர் டிராக்டரில் டிரைவராக வேலை பார்த்து வந்துள்ளார். இந்நிலையில் ஆலங்குப்பம் தேசிய நெடுஞ்சாலையில் முருகன் டிராக்டர் ஓட்டி சென்று கொண்டிருந்தார். அப்போது பின்னால் வந்த கார் திடீரென அவரது டிராக்டர் மீது மோதியது. இதில் டிராக்டரிலிருந்து தூக்கி வீசப்பட்ட முருகன் சாலையில் கீழே விழுந்தார். அப்போது அங்கு வந்த மற்றொரு கார் முருகன் மீது மோதியதில் அவர் சம்பவ இடத்திலேயே பரிதாபமாக உயிரிழந்தார்.
இதனைப் பார்த்த அருகிலிருந்தவர்கள் இதுகுறித்து ஆம்பூர் காவல்துறையினருக்கு தகவல் தெரிவித்துள்ளனர். அந்த தகவலின் படி சம்பவ இடத்திற்கு விரைந்து சென்ற காவல்துறையினர் முருகனின் உடலை உடனடியாக மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இது குறித்து வழக்கு பதிவு செய்த காவல்துறையினர் விசாரணை நடத்தி வருகின்றனர்.