மரத்தின் மீது கார் மோதிய விபத்தில் பால்பண்ணை உதவி மேலாளர் உயிரிழந்த சம்பவம் சோகத்தை ஏற்படுத்தியுள்ளது.
கோயம்புத்தூர் மாவட்டத்திலுள்ள பொள்ளாச்சி பகுதியில் முகிலன் என்பவர் வசித்து வந்துள்ளார். இவருக்கு மனைவி மற்றும் 2 குழந்தைகள் உள்ளனர். இவர் பொள்ளாச்சியில் உள்ள தனியார் பால் பண்ணையில் உதவி மேலாளராக பணிபுரிந்து வந்துள்ளார். இந்நிலையில் முகிலனும் அவருடன் வேலை பார்க்கும் மற்றொரு உதவி மேலாளரான அகிலேஸ்வரன் என்பவரும் பால் சேகரிப்பு மையங்களில் ஆய்வு செய்வதற்காக காரில் வந்துள்ளனர். இந்த காரை பொள்ளாச்சி பகுதியில் வசிக்கும் நாகராஜ் என்பவர் ஓட்டி வந்துள்ளார். இந்நிலையில் திருப்பூர் மாவட்டத்திலுள்ள பல்லடம் பகுதியில் கார் வந்து கொண்டிருந்தது. அப்போது திடீரென கார் கட்டுப்பாட்டை இழந்து சாலையோரம் இருந்த மரத்தில் மோதி விபத்துக்குள்ளானது.
இந்த விபத்தில் காரின் முன் பகுதியில் அமர்ந்திருந்த முகிலனுக்கு பலத்த காயம் ஏற்பட்டது. இதனைப் பார்த்த அருகில் உள்ளவர்கள் பல்லடம் காவல் துறையினருக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் விபத்தில் சிக்கியவர்களை மீட்டு பல்லடம் அரசு மருத்துவமனைக்கு சிகிச்சைக்காக அனுப்பி வைத்தனர். ஆனால் முகிலனை பரிசோதனை செய்த மருத்துவர்கள் அவர் ஏற்கனவே இறந்துவிட்டதாக தெரிவித்துள்ளனர். அதன்பின் அகிலேஸ்வரன், நாகராஜ் ஆகியோருக்கு தீவிர சிகிச்சை அளிக்கப்பட்டு வருகிறது. மேலும் இது குறித்து வழக்குப்பதிவு செய்த காவல்துறையினர் விசாரணை நடத்தி வருகின்றனர்.