தமிழக சட்டத்துறை அமைச்சர் ரகுபதி ஒரு முக்கிய செய்தி குறிப்பை வெளியிட்டுள்ளார். அதில் கூறப்பட்டிருப்பதாவது, தமிழகத்தில் உள்ள அனைத்து சிறைச்சாலைகளிலும் சிசிடிவி கேமராக்கள் பொருத்தப்பட்டு வருகிறது. தற்போது மாநிலம் முழுவதும் உள்ள 12 சிறைச்சாலைகளில் சிசிடிவி கேமராக்கள் பொருத்தும் பணி தொடங்கப்பட்டுள்ளது. இதைத்தொடர்ந்து மாநிலம் முழுதும் உள்ள அனைத்து சிறைச்சாலைகளிலும் சிசிடிவி கேமராக்கள் பொருத்தப்படும். அதன் பிறகு சிறையில் குற்றங்கள் எதுவும் நடைபெறாமல் இருப்பதற்காக சிறை காவலர்களின் சட்டைகளிலும் கேமராக்கள் பொருத்தப்படும்.
இந்த கேமராக்களை சென்னையில் உள்ள தலைமைச் செயலகத்தில் இருந்து அதிகாரிகள் தொடர்ந்து கண்காணிப்பார்கள் என்று குறிப்பிடப்பட்டுள்ளது. இந்நிலையில் கொலை, கொள்ளை, கற்பழிப்பு போன்ற பல்வேறு குற்றங்கள் தற்போது அதிகரித்துள்ள நிலையில் அனைத்து பொது இடங்களிலும் சிசிடிவி கேமராக்கள் பொருத்தப்பட்டு வருகிறது. இந்த சிசிடிவி கேமராக்கள் குற்றங்களை கண்காணிக்க பெரிய அளவில் உதவுவதோடு, குற்றவாளிகளை கண்டுபிடிக்கவும் பயனுள்ளதாக இருக்கிறது. மேலும் காவல்துறையினருக்கு குற்றவாளிகளை கண்டுபிடிக்க சிசிடிவி கேமராக்கள் பெரிய அளவில் உதவுகிறது என்பது குறிப்பிடத்தக்கதாகும்.