கடையில் இருக்கும் பெண்ணிடம் இருந்து தங்கச் சங்கிலியை பறிக்க முயன்ற மர்மநபர்கள் காவல்துறையினர் வலைவீசி தேடி வருகின்றனர்.
மதுரை மாவட்டத்திலுள்ள சமயநல்லூர் பகுதியில் கணேசன்-மாணிக்கவல்லி என்ற தம்பதியினர் வசித்து வருகின்றனர். இவர்கள் அப்பகுதியில் பலசரக்கு கடை ஒன்றை நடத்தி வருகின்றனர். இந்நிலையில் சம்பவம் நடந்த அன்று கடையில் மாணிக்கவல்லி வியாபாரம் செய்து கொண்டிருந்தார். அப்போது 2 வாலிபர்கள் இருசக்கர வாகனத்தில் கடைக்கு வந்து சில பொருட்களை கூறி தருமாறு கேட்டுள்ளனர்.
அதன்பின் மாணிக்கவல்லி அந்தப் பொருட்களை எடுத்துக் கொண்டு வந்து தரும் போது அவர் கழுத்தில் அணிந்திருந்த தங்கச்சங்கிலியை மர்ம நபர்கள் பறிக்க முயற்சித்துள்ளனர். ஆனால் மாணிக்கவல்லி சுதாரித்துக்கொண்டு தங்கச்சங்கிலியை கையில் இறுக்கமாக பிடித்துக்கொண்டார். இதில் 1 1/2 பவுன் மட்டும் மர்ம நபர்களின் கையில் சிக்கியுள்ளது. அதனை மட்டும் எடுத்துக் கொண்டு அவர்கள் அங்கிருந்து தப்பிச் சென்றுள்ளனர்.
ஆனால் மீதமுள்ள 4 1/2 பவுன் தங்க சங்கிலி மாணிக்கவல்லியின் கையில் உள்ளது. இதுகுறித்து மாணிக்கவல்லி அருகில் உள்ள காவல் நிலையத்தில் புகார் அளித்துள்ளார். இந்த புகாரின் பேரில் காவல்துறையினர் வழக்குப்பதிவு செய்து தங்க சங்கிலியை பறித்து சென்ற மர்ம நபர்களை வலைவீசி தேடி வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.