மேயர் பிரியா ராஜன் சென்னை மாநகராட்சி 2022 – 2023 நிதியாண்டுக்கான நிதிநிலை அறிக்கையை தாக்கல் செய்தார்.
மேயர் பிரியா ராஜன் சென்னை மாநகராட்சி 2022 – 2023 நிதியாண்டுக்கான நிதிநிலை அறிக்கையை தாக்கல் செய்தார். அதில் மழைநீர் வடிகால் மற்றும் வெள்ளத்தடுப்பு பணிகளுக்கான நிதி மற்றும் செயல்திட்டங்கள் போன்ற அறிவிப்புகள் பின்வருமாறு:
“ஒவ்வொரு ஆண்டும் பருவ மழைக் காலங்களில், சென்னையில் வெள்ளம் மற்றும் மழைநீர் தேக்கம் ஏற்படுகிறது. பருவ மழைக்காலம் தொடங்குவதற்கு முன்னரே சென்னையில் உள்ள மழைநீர் வடிகால்வாய்கள் முழுவதும் பராமரிக்கப்பட்டு சீரமைக்கப்பட வேண்டும் என முதலமைச்சர் மு.க.ஸ்டாலின் அறிவுறுத்தியுள்ளார்.
1.சிங்கார சென்னை 2.0 நிதியில் மழைநீர் வடிகால் திட்டம்
சிங்கார சென்னை 2.0 நிதியில், 40.80 கி.மீ. நீளத்திற்கு ரூ.184.67 கோடி மதிப்பீட்டில் மழைநீர் வடிகால் அமைக்க ஒப்பந்தப் போடப்பட்டு பணிகள் நடைபெற்று வருகின்றன. இப்பணிகள் இந்த நிதியாண்டில் முடிக்கப்படும். மேலும், இரண்டாம் கட்டமாக, 20.08 கி.மீ நீளத்திற்கு ரூ.70 கோடி மதிப்பீட்டில் மழைநீர் வடிகால் அமைக்க நடவடிக்கை எடுக்கப்படும்.
2.உலக வங்கி நிதியின் கீழ் மழைநீர் வடிகால்வாய்கள் அமைக்கும் பணி
2020ஆம் ஆண்டு பருவமழையில் மிகவும் பாதிக்காபட்ட மற்றும் விடுப்பட்ட இடங்களில் மழைநீர் வடிகால் அமைக்க ரூ.120 கோடி மதிப்பில் 45 கி.மீ நீளத்திற்கு உலக வங்கி நிதியில் மேற்கொள்ள தமிழக அரசு அனுமதி அளித்துள்ளது. முன்னதாகவே தமிழ்நாடு அரசால் நிதி ஒதுக்கப்பட்டுள்ள நிலையில் உலக வங்கி நிதியின் கீழ் 43 சிப்பங்களில் 2022-2023ஆம் நிதியாண்டிற்குள் மழைநீர் வடிகால் அமைக்கும் பணிகள் அனைத்தும் முடிக்கப்படும்.
3. உட்கட்டமைப்பு மற்றும் வசதிகள் நிதியின் கீழ் பணி
பருவமழை 2020 மற்றும் 2021ஆம் ஆண்டு வெள்ளத்தினால் மிகவும் பாதிப்படைந்த இடங்களில், தமிழக அரசின் உட்கட்டமைப்பு மற்றும் வசதிகள் (Infrastructure and Amenities Fund) நிதியிலிருந்து வரப்பெற்ற தொகையிலிருந்து, பல்வேறு இடங்களில் 6 சிப்பங்களில் ரூ.26.28 கோடி மதிப்பில் 2022-23ஆம் நிதியாண்டிற்குள் மழைநீர் வடிகால் அமைக்கும் பணிகள் முடிக்கப்படும்.
4.ஆசிய வளர்ச்சி வங்கி நிதியில் மழைநீர் வடிகால் அமைக்கும் பணி
பெருநகர சென்னை மாநகராட்சியின் விரிவாக்கம் செய்யப்பட்ட பகுதிகளில், கொசஸ்தலையாறு வடிநில பகுதிகளில், மண்டலம்-1, 2, 3, 6 (பகுதி), 7 (பகுதி) மற்றும் 8 (பகுதி)யில் உள்ள இடங்களில், ஒருங்கிணைந்த மழைநீர் வடிகால் அமைக்கும் பணிக்கு 769 கி.மீ நீளத்தில், ரூ.3,220 கோடி மதிப்பீட்டில் மேற்கொள்ள தமிழக அரசு ஏற்கனவே அனுமதி வழங்கியுள்ளது. மண்டலம்-1, 2, 3, 6 (பகுதி), 7 (பகுதி) மற்றும் 8 (பகுதி)யில் ஆசிய வளர்ச்சி வங்கி நிதியில், ஒருங்கிணைந்த மழைநீர் வடிகால் அமைக்கும் பணி 46 சிப்பங்களாக பிரிக்கப்பட்டு 2022-23 நிதியாண்டில் ரூ.600 கோடி மதிப்பீட்டில் ஒருங்கிணைந்த மழைநீர் வடிகால் துரிதமாக அமைக்கப்படும்.
5.KfW என்ற ஜெர்மன் நாட்டு வங்கி நிதியில் ஒருங்கிணைந்த மழைநீர் வடிகால் அமைக்கும் பணி
KfW என்ற ஜெர்மன் நாட்டு வங்கி நிதியில், பெருநகர சென்னை மாநகராட்சியின் விரிவாக்கம் செய்யப்பட்ட பகுதிகளில், கோவளம் வடிநில பகுதியில், மண்டலம்-12 (பகுதி), மண்டலம்-14, மண்டலம்-15ல் உள்ள இடங்களில், ஒருங்கிணைந்த மழைநீர் வடிகால் அமைக்கும் பணிக்கு 360 கி.மீ நீளத்தில் ரூ.1,714 கோடி மதிப்பீட்டில் மேற்கொள்ள தமிழக அரசு ஏற்கனவே அனுமதி அளித்துள்ளது.
KfW என்ற ஜெர்மன் நாட்டு வங்கி நிதியுதவி உடன் ஒருங்கிணைந்த மழைநீர் வடிகால் அமைக்கும் பணிகள் பல்வேறு சிப்பங்களாக பிரிக்கப்பட்டு, மேற்கொள்ளப்பட உள்ளது. இத்திட்டத்தில் 2022 – 2023- ஆம் நிதியாண்டில் ரூ.300 கோடி மதிப்பீட்டில் ஒருங்கிணைந்த மழைநீர் வடிகால் அமைக்கப்படும்.
6.குளங்களை மேம்படுத்தும் பணி
பெருநகர சென்னை மாநகராட்சியில் உள்ள குளங்களை மேம்படுத்தும் திட்டத்தின் கீழ், 5 மிகப்பெரிய குளங்கள் புனரமைப்பு பணி ரூ.143 கோடி மதிப்பீட்டில், இந்திய அரசின் அம்ரூட் 2.0 திட்ட நிதியிலிருந்து கீழ்கண்ட இடங்களில் மேற்கொள்ள நடவடிக்கை எடுக்கப்படும் மணலி ஏரி, சாத்தாங்காடு குளம், சடையன்குப்பம் குளம், மாதவரம் பெரிய ஏரி, அண்ணா நெடுஞ்சாலை குளம்
7.மழைநீர் வடிகால் தூர்வாரும் பணி
நடப்பு நிதியாண்டிலிருந்து மழைநீர் வடிகால் தூர்வாரும் பணிகள் நடைபெறுவதற்கு ஏதுவாக மண்டலம்-4 மற்றும் மண்டலம் -6ல் நகர்ப்புற வேலை வாய்ப்பு திட்டத்தின் நிதியின் கீழும், மற்ற மண்டலங்களில் பெருநகர சென்னை மாநகராட்சி நிதியின் மூலமும், வருடம் முழுவதும் மழைநீர் வடிகால் தூர்வாரும் பணி மேற்கொள்ளப்படும்” என அறிவிக்கப்பட்டுள்ளது.