தமிழ்நாட்டில் 10 ஆண்டுகளுக்கு பிறகு திமு கழகம் ஆட்சி அதிகாரத்தை கைப்பற்றியுள்ளது. பெறுப்பேற்ற புதிய அரசு என்ன மாதிரியான ஆட்சியை தரப்போகிறது என்ற எதிர்பார்ப்பு மக்களிடம் எழுந்த நிலையில், கொரோனா பாதிப்பு, ஆக்சிஜன் தட்டுப்பாடு, தமிழ்நாடு அரசின் கடன் சுமை உள்ளிட்ட கடுமையான சவால்களும் அவர் முன் காத்திருந்தது.
ஜூன் 7-ம் தேதியோடு அதாவது நேற்றுடன் முதலமைச்சராக ஸ்டாலின் பதவியேற்று ஒரு மாதம் நிறைவடைந்துள்ள நிலையில், இதுவரை அவர் எடுத்த முக்கிய முடிவுகள், தொடங்கிய திட்டங்களைப் பார்க்கலாம்.
பதவியேற்ற முதல் நாளிலேயே 5 புதிய திட்டங்களுக்கான 5 கோப்புகளில் கையொப்பமிட்டார். அதன்படி 2.07 அரிசி குடும்ப அட்டைதாரர்களுக்கு தலா ரூ.2,000 கொரோனா நிவாரண நிதி வழங்கும் திட்டம், ஆவின் பால் விலை லிட்டருக்கு ரூ.3 குறைப்பு, அனைத்து மகளிரும் சாதாரண கட்டண நகரப் பேருந்துகளில் கட்டணமில்லாமல் பயணம் செய்ய ஆணை, மக்களின் பல்வேறு பிரச்னைகளுக்கு தீர்வுகாண ‘உங்கள் தொகுதியில் முதல்வர் ’ என்ற புதிய துறை உருவாக்கம், தனியார் மருத்துவமனைகளில் முதலமைச்சர் காப்பீட்டுத் திட்டத்தின் கீழ் கொரோனா நோய்க்கு சிகிச்சை, சிகிச்சைக்கான செலவினத்தை அரசே ஏற்பு ஆகிய 5 திட்டங்களுக்கான கோப்புகளில் கையெழுத்திட்டார்.
இந்த திட்டங்கள் கொரோனா காலத்தில் பொதுமக்களிடம் கவனம் பெற்றது. அதிலும் கொரோனா நிவாரண நிதி வழங்கும் அதேநேரத்தில் டாஸ்மாக் திறக்கப்படாது என்று உறுதியான நடவடிக்கை அனைத்து தரப்பினரிடம் வரவேற்பைப்பெற்றது.
இந்த அரசு கொரோனாவை கட்டுப்படுத்துவதை பிரதானமாக கருதி, அதற்கான நடவடிக்கைக்கு முக்கியத்துவம் கொடுத்தது. கொரோனா குறித்த பிரச்சனைகளுக்கு தீர்வு காண ஆலோசனை குழுவை அமைத்துள்ளது.
தமிழக கடன்சுமையால் தவித்த நிலையில், கொரோனா பணிகளுகளை மேற்கொள்வதற்காக, தாராளமாக நிதி வழங்கலாம் என கோரிக்கை வைத்தார். அதன்மூலம் முதலமைச்சரின் பொது நிவாரண நிதிக்கு 180 கோடிக்கு மேல் நிதியை திரட்டியுள்ளார்.
தினசரி கொரோனா தொற்று பாதிப்பு குறைப்பதற்கான கடும் முயற்சிகளை மேற்கொண்டதோடு யாரும் எதிர்பாராத வண்ணம், முழு கவச உடை அணிந்து கொரோனா வார்டில் அதிரடியாக ஆய்வு மேற்கொண்டார்.
மத்திய அரசிடம் வலியுறுத்தி 900 டன் ஆக்சிஜன் பெற்று பாற்றாக்குறை இல்லா மாநிலமாக உருவெடுக்க செய்துள்ளார்.
பத்திரிகையாளர்கள் மற்றும் ஊடகத் துறையில் பணியாற்றும் செய்தியாளர்கள் கொரோனாவால் உயிரிழந்தால், அவர்களின் குடும்பத்திற்கு தலா 10 லட்சம் நிவாரணம் வழங்கப்படும் என அறிவித்தார்.
கொரோனா தொற்றால் பெற்றோரை இழந்த குழந்தைகளுக்கு அவர்களின் பெயரில் 5 லட்சம் ரூபாய் வைப்பீட்டு தொகை செலுத்தப்படும் என்றும், பட்டப்படிப்பு வரை அவைகளுக்கான கல்விச் செலவையும் அரசு ஏற்கும் எனவும் அறிவித்தார்.
கொரோனா சூழலில் மாணவர்களின் நலனை கருத்தில் கொண்டு 12-ம் வகுப்பு தேர்வு ரத்து செய்துள்ளார்.
ஜூன் 3-ம் தேதி கருணாநிதி பிறந்த நாளன்று கொரோனா நிவாரணம் இரண்டாவது தவணையாக 2 ரூபாய், குடும்ப அட்டைதாரர்களுக்கு 13 மளிகைப் பொருட்கள் அடங்கிய தொகுப்பு, திருநங்கைகளுக்கும் 2 ஆயிரம் ரூபாய் கொரோனா நிவாரணம் வழங்குவதை தொடங்கி வைத்துள்ளார்.