இருசக்கர வாகனம் நேருக்கு நேர் மோதி கொண்டத்தில் கூட்டுறவு சங்க செயலாளர் படுகாயமடைந்து உயிரிழந்த சம்பவம் அவரது குடும்பத்தினரிடையே சோகத்தை ஏற்படுத்தியுள்ளது.
ராமநாதபுரம் மாவட்டம் திருவாடனை பகுதியில் உள்ள மல்லனூர் கிராமத்தில் மணிமுத்து என்பவர் வசித்து வந்துள்ளார். இவர் எட்டுகுடி கூட்டுறவு சங்கத்தில் செயலாளராக பணியாற்றி வந்துள்ளார். இந்நிலையில் சம்பவத்தன்று மணிமுத்து இருசக்கர வாகனத்தில் வெளியே சென்றுள்ளார். அப்போது திருவாடனை சமத்துவபுரம் பகுதியில் உள்ள ஆதிதிராவிடர் மாணவர் விடுதி அருகே சென்று கொண்டிருந்தபோது எதிரே மாற்றுத்திறனாளியான ராம்கி இருசக்கர வாகனம் ஓட்டி வந்துள்ளார். இதனையடுத்து ராம்கியின் இருசக்கர வாகனம் கட்டுபாட்டை இழந்து மணிமுத்து மீது மோதியுள்ளது.
இந்த விபத்தில் படுகாயமடைந்த அவரை அங்கிருந்தவர்கள் மீட்டு மருத்துவமனைக்கு அனுப்பி வைத்துள்ளனர். அங்கு பரிசோதனை செய்த மருத்துவர்கள் மேல் சிகிச்சைக்காக மதுரை தனியார் மருத்துவமனைக்கு அனுப்பி வைத்துள்ளனர். இதனைதொடர்ந்து மணிமுத்துவிற்கு தீவிர சிகிச்சை அளிக்கப்பட்டும் சிகிச்சை பலனின்றி உயிரிழந்துள்ளார். இதுகுறித்து தகவலறிந்து சென்ற காவல்துறையினர் மணிமுத்துவின் உடலை பிரேத பரிசோதனைக்காக திருவாடனை அரசு மருத்துவமனைக்கு அனுப்பி வைத்துள்ளனர். மேலும் இச்சம்பவம் குறித்து வழக்குபதிவு செய்து விசாரணை மேற்கொண்டு வருகின்றனர்.