தமிழ் திரையுலகில் முன்னணி நடிகராக திகழ்பவர் அஜித். இவர் நடிப்பில் மட்டுமின்றி பைக் ரேஸ், கார் ரேஸ், போட்டோ கிராபி, ஆளில்லா சிறிய ரக விமானம் தயாரித்தல்,மாணவர்களுக்கு ட்ரோன் பயிற்சி அளித்தல் உள்ளிட்ட திறமைகளையும் கொண்டுள்ளார். அஜித் தற்போது வலிமை படத்தில் நடித்து வருகிறார். இதற்கிடையில் அவ்வப்போது சென்னை ரைஃபிள் கிளப்பில் துப்பாக்கி சுடும் பயிற்சி மேற்கொண்டு வந்தார். இந்நிலையில் தமிழ்நாடு மாநில 46வது துப்பாக்கி சுடும் போட்டி நடைபெற்றது. அதில் பங்கேற்ற அஜித் முதலிடம்பிடித்து தங்கப்பதக்கத்தை வென்று உள்ளார். இதனை அஜித் ரசிகர்கள் கொண்டாடி வருகின்றனர்.
இந்நிலையில் துணை முதல்வர் ஓ.பன்னீர்செல்வம் அஜித்தை பாராட்டி டுவிட் செய்துள்ளார். அதில், “தன்னுடைய அயராத உழைப்பாலும், தன்னம்பிக்கையாலும் திரைத்துறை மட்டுமல்லாமல் பல துறைகளிலும் சாதனை பெற்று வரும் அஜித் சென்னையில் நடைபெற்ற 46வது தமிழ்நாடு மாநில துப்பாக்கி சுடுதல் போட்டியில் தங்கம் வென்றதில் பெரும் மகிழ்ச்சி என்றும், அவருக்கு என்னுடைய அன்பார்ந்த வாழ்த்துக்கள் என்றும் பதிவு செய்துள்ளார்.