மர்ம நபர் தாக்கியதால் கூலி தொழிலாளி பலியான சம்பவம் சோகத்தை ஏற்படுத்தியுள்ளது.
திருச்சி மாவட்டத்திலுள்ள திருவானைக்காவல் பகுதியில் கூலி தொழிலாளியான மனோகரன் என்பவர் வசித்து வந்துள்ளார். இவர் தனது வீட்டு வாசலில் படுத்து தூங்கி கொண்டிருந்த போது நள்ளிரவு நேரத்தில் மர்ம நபர் மோட்டார் சைக்கிளில் அங்கு சென்றுள்ளனர். இந்நிலையில் அந்த மர்ம நபர் மனோகரனின் சட்டை பைக்குள் இருந்த பணத்தை திருட முயற்சி செய்துள்ளார். அப்போது மனோகரன் எழுந்து அந்த மர்ம நபரை தடுக்க முயற்சி செய்துள்ளார்.
இதனை அடுத்து அந்த மர்ம நபர் மனோகரனை சரமாரியாக தாக்கி விட்டு அங்கிருந்து மோட்டார் சைக்கிளில் தப்பி சென்று விட்டார். அதன் பின் மர்ம நபர் தாக்கியதால் நிலை தடுமாறி கீழே விழுந்த மனோகரனை அக்கம்பக்கத்தினர் மீட்டு மருத்துவமனையில் சிகிச்சைக்காக அனுமதித்துள்ளனர். ஆனால் அங்கு அளிக்கப்பட்ட சிகிச்சை பலனின்றி மனோகரன் பரிதாபமாக உயிரிழந்து விட்டார். இதுகுறித்து வழக்கு பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.