சீனாவில் தற்போது பிஎப் 7 என்ற உருமாறிய கொரோனா வைரஸ் பரவி வருகிறது. இதனால் இந்தியாவில் கொரோனா வைரஸ் பரவலை கட்டுப்படுத்துவதற்கான முன்னெச்சரிக்கை நடவடிக்கைகளை மத்திய அரசு மேற்கொண்டு வருகிறது. அந்த வகையில் கொரோனா வைரஸிலிருந்து மக்களை பாதுகாக்க அனைத்து மாநிலங்களுக்கும் மத்திய அரசு சில முக்கிய அறிவுறுத்தல்களை வழங்கியுள்ளது. அதன்படி விமான நிலையங்களில் தற்காலிகமாக நிறுத்தி வைக்கப்பட்டிருந்த கொரோனா பரிசோதனை இன்று முதல் அமல்படுத்தப்படும். அதன் பிறகு விமான நிலையத்திற்கு வரும் பயணிகள் 2 தவணை செலுத்தி இருக்க வேண்டும். இல்லையெனில் சமீபத்தில் எடுக்கப்பட்ட கொரோனா நெகட்டிவ் சான்றிதழை வைத்திருக்க வேண்டும்.
அதோடு முக கவசம் அணிந்தவர்கள் மட்டுமே விமான நிலையத்திற்குள் அனுமதிக்கப்படுவார்கள் என்று தெரிவிக்கப்பட்டுள்ளது. இந்நிலையில் சென்னை, தூத்துக்குடி, திருச்சி, மதுரை, கோவை உள்ளிட்ட விமான நிலையங்களில் மருத்துவ பரிசோதனைகளை மேற்கொள்ள மருத்துவ குழுவை நியமிக்கப் போவதாக தகவல் வெளியாகியுள்ளது. மேலும் பயணிகளுக்கு கொரோனா பாஸிட்டிவ் என்று வந்தால் அவர்கள் விமானத்தில் பயணம் செய்ய அனுமதிக்கப்பட மாட்டார்கள். அதோடு கொரோனா பாதிக்கப்பட்ட பயணியின் முகவரிக்குட்பட்ட மாவட்டத்திற்கு தகவல் தெரிவிக்கப்பட்டு அனைத்து பயணிகளுக்கும் கொரோனா பரிசோதனை மேற்கொள்ளப்படும் என்றும் தெரிவிக்கப்பட்டுள்ளது.