அரசு வழங்கும் சலுகை பணத்திற்காக உயிரிழந்த தாயின் சடலத்தை மறைத்த மகள் கைது செய்யப்பட்டுள்ளார்
அமெரிக்காவில் மரினேட் கவுண்டி பகுதியைச் சேர்ந்த ரூபி என்பவரது மகள் பவுலா. ரூபிக்கு மாதா மாதம் சமூகப்பாதுகாப்பு சலுகை பணம் தவறாமல் வந்துகொண்டிருந்தது. இந்நிலையில் சலுகை பணத்தை வாங்கிவரும் ரூபி எப்படி இருக்கிறார் என்பதை தெரிந்துகொள்ள அதிகாரிகள் சென்ற வருடம் செப்டம்பர் மாதம் ரூபியின் வீட்டிற்கு சென்றுள்ளனர். அப்போது வீட்டில் அவரது மகள் பவுலா மட்டுமே இருந்துள்ளார். அதிகாரிகள் பவுலாவிடம் அவரது தாயார் ரூபி குறித்து விசாரிக்கையில் அதிர்ச்சி தகவல் ஒன்று கிடைத்துள்ளது.
அதாவது சலுகை பணம் பெற்று வந்த ரூபி மரணமடைந்து விட்டார் என்றும், அவரது சடலம் கீழ்தளத்தில் இருக்கும் தொட்டியில் மறைத்து வைக்கப்பட்டதாகவும் பவுலா அதிகாரிகளிடம் கூறினார்.இதனைத்தொடர்ந்து காவல்துறையினர் வரவழைக்கப்பட்டு தொட்டியைத் திறந்து பார்த்தபோது அதில் ரூபியின் சடலம் இருந்தது. பின்னர் பவுலா காவல்துறையினரால் கைது செய்யப்பட்டார்.
அவர் அளித்த வாக்குமூலத்தின் அடிப்படையில் ரூபி கொலை செய்யப்படவில்லை என்றும் அவரது சமூக பாதுகாப்பு சலுகை பணம் தவறாமல் கிடைக்க வேண்டும் என்பதற்காக அவரது மரணம் மறைக்கப்பட்டது என்பதும் தெரியவந்தது. கைது செய்யப்பட்ட பவுலா மீதான விசாரணை நீதிமன்றத்தில் நடைபெற்ற நிலையில் வரும் அக்டோபர் மாதம் ஐந்தாம் தேதி அவருக்கான தண்டனை குறித்து தெரியவரும் என அறிவிக்கப்பட்டுள்ளது.
