மோட்டார் சைக்கிள் மீது முறிந்து விழுந்த மரம்…. தந்தை மகனுக்கு நேர்ந்த பரிதாபம்…. சோகத்தில் குடும்பத்தினர்….!!

மோட்டார் சைக்கிள் மீது மரம் முறிந்து விழுந்ததில் தந்தை, மகன் உயிரிழந்த சம்பவம் சோகத்தை ஏற்படுத்தியுள்ளது.

வேலூர் மாவட்டத்திலுள்ள வி.மத்தூர் கிராமத்தில் வெங்கடேசன் என்பவர் வசித்து வந்துள்ளார். இவர் உப்பரப்பள்ளியில் உள்ள துணை மின் நிலையத்தில் லைன் மேலாக வேலை செய்து வந்துள்ளார். கடந்த 4-ந் தேதி வெங்கடேசன் தனது மகன் கோபிநாத்துடன் மோட்டார் சைக்கிளில் குடியாத்தத்தில் இருந்து தனது கிராமத்திற்கு சென்று கொண்டிருந்தார். அப்போது ராமாலை தண்ணீர் பந்தல் பகுதியில் சென்று கொண்டிருந்தபோது சாலையோரம் இருந்த பூ மரம் ஒன்று தந்தை மகன் சென்று கொண்டிருந்த மோட்டார் சைக்கிள் மீது திடீரென விழுந்தது.

இதில் வெங்கடேசன் மற்றும் கோபிநாத் இருவரின் மீது விழுந்ததில் தலை நசுங்கி பலத்த காயமடைந்தனர். அந்த வழியாக வந்த பொதுமக்கள் மரத்தை அப்புறப்படுத்தி இருவரையும் மீட்டு குடியாத்தம் அரசு மருத்துவமனைக்கு சிகிச்சைக்காக அனுப்பி வைத்தனர். அதன்பின் மேல் சிகிச்சைக்காக சென்னை ராஜீவ் காந்தி மருத்துவமனையில் அனுமதித்தனர். அங்கு அளிக்கப்பட்ட சிகிச்சை பலனின்றி வெங்கடேசன் கடந்த 6-ந்தேதி உயிரிழந்தார். இதனை தொடர்ந்து அவரது மகன் கோபிநாத்தும் சிகிச்சை பலனின்றி உயிரிழந்தார். இதுகுறித்து வழக்கு பதிவு செய்த பரதராமி காவல்துறையினர் விசாரணை மேற்கொண்டு வருகின்றனர்.