பிறந்து 2 நாட்களே ஆன பச்சிளம் குழந்தையின் சடலம் கிணற்றிலிருந்து மீட்கப்பட்ட சம்பவம் பரபரப்பை ஏற்படுத்தியுள்ளது.
விழுப்புரம் மாவட்டத்திலுள்ள செஞ்சி பகுதியில் விவசாயியான பாலகிருஷ்ணன் என்பவர் வசித்து வருகிறார். இவர் தனக்கு சொந்தமான விவசாய கிணற்றை தூர்வார முடிவெடுத்து கிரேன் எந்திரத்தை வரவழைத்துள்ளார். அப்போது அந்த கிணற்றுக்குள் பச்சிளம் குழந்தையின் சடலம் கிடப்பதை பார்த்து அதிர்ச்சி அடைந்த பாலகிருஷ்ணன் உடனடியாக காவல்துறையினருக்கு தகவல் தெரிவித்துள்ளார்.
அந்த தகவலின்படி சம்பவ இடத்திற்கு விரைந்து சென்ற காவல்துறையினர் தொப்புள் கொடியுடன் காணப்பட்ட குழந்தையின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் பிறந்து 2 நாட்களே ஆன பெண் குழந்தையை கிணற்றில் வீசி சென்றவர்களின் விவரம் குறித்து தீவிர விசாரணை மேற்கொண்டு வருகின்றனர்.