டெல்லி கேப்பிட்டல்ஸ் அணி சன்ரைசர்ஸ் ஹைதராபாத் அணியை 39 ரன்கள் வித்தியாசத்தில் வீழ்த்தி புள்ளி பட்டியலில் 2வது இடத்தை பிடித்துள்ளது
ஐ.பி.எல் 30 வது லீக் போட்டியில் சன்ரைசர்ஸ் ஹைதராபாத் மற்றும் டெல்லி கேப்பிட்டல்ஸ் அணியும் விளையாடி வருகின்றன. இப்போட்டி ஹைதராபாத் ராஜிவ் காந்தி ஸ்டேடியத்தில் நேற்று இரவு 8 மணிக்கு தொடங்கியது. இதில் டாஸ் வென்ற ஹைதராபாத் அணி கேப்டன் கேன் வில்லியம்சன் பந்து வீச்சை தேர்வு செய்தார். இதையடுத்து டெல்லி அணியின் தொடக்க வீரர்களாக ஷிகர் தவானும், பிருத்விஷாவும் களமிறங்கினர். பிருத்வி ஷா 4 , ஷிகர் தவான் 7 ரன்னில் ஆட்டமிழக்க அதிரடியாக விளையாடிய கோலின் மன்ரோ 40 (24) ரன்கள் குவித்து ஆட்டமிழந்தார். இதையடுத்து வந்த ஷ்ரேயஸ் ஐயர் 45 (40) ரன்களும், ரிஷப் பண்ட்டும் 23 (19) ரன்களும் குவித்து ஆட்டமிழந்தனர்.
மற்ற வீரர்கள் சொற்ப ரன்னில் ஆட்டமிழக்க 20 ஓவர் முடிவில் டெல்லி அணி 7 விக்கெட் இழந்து 155 ரன்கள் குவித்தது.சன்ரைசர்ஸ் அணியில் அதிகபட்சமாக கலீல் அகமது 3 விக்கெட்டுகளும், புவனேஸ்வர் குமார் 2 விக்கெட்டுகளும், அபிஷேக் சர்மா, ரஷித் கான் ஆகியோர் தலா 1 விக்கெட்டும் வீழ்த்தினர். இதையடுத்து 156 ரன்கள் இலக்கை நோக்கி சன்ரைசர்ஸ் அணியின் தொடக்க வீரர்களாக ஜானி பேர்ஸ்டோவும், டேவிட் வார்னரும் களமிறங்கினர். இருவரும் பொறுப்புடன் விளையாடி ரன்கள் சேர்த்தனர்.
நல்ல துவக்கம் கொடுத்த நிலையில் ஜானி பேர்ஸ்டோ 41 (31) ரன்களில் ஆட்டமிழந்தார். அதன் பிறகு வந்த கேப்டன் கேன் வில்லியம்சன் 3, ரிக்கி புய் 7 ரன்களிலும் வெளியேறினர். அதை தொடர்ந்து வார்னரும் 51 (47) ரன்களில் ஆட்டமிழந்தார். அடுத்து வந்த விஜய் சங்கர் 1, தீபக் ஹூடா 3, ரஷித் கான் 0, அபிஷேக் சர்மா 2, புவனேஸ்வர் குமார் 2, கலீல் அகமது 0 என 18.5 ஓவரில் அனைத்து விக்கெட்டுகளையும் இழந்து 116 ரன்கள் மட்டுமே எடுத்தது.
ஹைதராபாத் அணியில் சந்தீப் சர்மா 1* ரன்னுடன் ஆட்டமிழக்காமால் களத்தில் இருந்தார். இதனால் டெல்லி அணி 39 ரன்கள் வித்தியாசத்தில் வெற்றி பெற்றது. டெல்லி அணியில் அதிகபட்சமாக ககிசோ ரபாடா 4 விக்கெட்டுகளும், கிறிஸ் மோரிஸ், கீமோ பால் ஆகியோர் தலா 3 விக்கெட்டுகளும் வீழ்த்தினர். டெல்லி அணி இந்த வெற்றியின் மூலம் புள்ளி பட்டியலில் 2வது இடத்திற்கு முனனேறியுள்ளது.