அசம்பாவிதங்களை தடுக்கும் பொருட்டு டெல்லி எல்லைகளில் இணைய தள சேவை முடக்கத்தை மத்திய உள்துறை அமைச்சகம் நீட்டித்துள்ளது.
தலைநகர் டெல்லியில் பல்வேறு எல்லைகளில் இரண்டு மாதங்களுக்கும் மேலாக விவசாயிகள் மத்திய அரசின் புதிய வேளாண் சட்டங்களுக்கு எதிர்ப்பு தெரிவித்து போராடுகின்றனர். மேலும் கடந்த 26ம் தேதி குடியரசு தினத்தன்று டெல்லியில் விவசாயிகள் நடத்திய பேரணியில் பயங்கரமான வன்முறை வெடித்தது. இதனால் டெல்லியில் இணையதள சேவையானது தற்காலிகமாக பதற்றமான சூழல் மற்றும் அசம்பாவிதங்களை தடுக்கும் நடவடிக்கையாக துண்டிக்கப்பட்டுள்ளது.
இதனையடுத்து மத்திய உள்துறை அமைச்சகம் 29ஆம் தேதி இரவு 11 மணி முதல் 31-ஆம் தேதி இரவு 11 மணிவரை பொது அவசரநிலை, பொது பாதுகாப்பு சட்ட விதியின் கீழ் விவசாயிகள் போராடும் டெல்லியின் எல்லைப்பகுதிகளில் இணையதள சேவையை துண்டித்துள்ளது. இந்நிலையில் இன்று (செவ்வாய்க்கிழமை) இரவு வரை இணையதள சேவை முடக்கமானது டெல்லியின் காசிப்பூர், திக்ரி மற்றும் சிங்கு போன்ற இடங்களில் நீடிக்கப்பட்டுள்ளதாக மத்திய உள்துறை அமைச்சகம் சார்பில் தெரிவிக்கப்பட்டுள்ளது.