யார் யாருக்கு சட்டமன்ற உறுப்பினர் சீட் கொடுக்க வேண்டும் என்பதை நாங்கள் தான் முடிவு செய்வோம் என மேடையில் வைத்து மகனை துரைமுருகன் எச்சரித்தார்.
வேலூர் மாநகராட்சி பழைய அலுவலகத்தில், கதிர் ஆனந்த் எம்.பி-க்கான அலுவலகத் திறப்பு விழா நேற்று நடைபெற்றது. இந்த நிகழ்ச்சியில், தி.மு.க பொருளாளர் துரைமுருகன், அரக்கோணம் எம்.பி ஜெகத்ரட்சகன், எம்.எல்.ஏ-க்கள் நந்தகுமார், கார்த்திகேயன் உள்பட பலர் கலந்துகொண்டனர்.
இந்நிகழ்ச்சியில் துரைமுருகன் மகன் கதிர் ஆனந்த் பேசுகையில், “அணைக்கட்டு சட்டமன்ற உறுப்பினர் நந்தகுமார் தான் நிரந்தர சட்டமன்ற உறுப்பினர்” என்று பேசினார்.
அதற்கு துரைமுருகன் பதிலளிக்கையில், “வேலூர், அணைக்கட்டுத் தொகுதிகளில் எம்.எல்.ஏ-வுக்கு யார் நிற்பது என்று முடிவெடுக்கும் அதிகாரம் எனக்கும் ஸ்டாலினுக்கும்தான் இருக்கிறது. இப்போதைய எம்.எல்.ஏ-க்களை `நிரந்தர சட்டமன்ற உறுப்பினர்’ என்று என் மகன் கதிர் ஆனந்த் பேசியிருக்கிறார். நீ சொல்வதைப்போல் சட்டமன்றத் தொகுதியை நிரந்தரமாக்கிவிட்டால் அவர்கள் எங்களை மதிப்பார்களா? எம்.பி சீட்டுக்கு உன்னை முடிவுசெய்வதற்காக நான் பட்ட பாடே இன்னும் தீரவில்லை” என்றார்.