“எங்கு வேலை செய்தாலும் எங்கு வாழ்ந்தாலும் தாய்நாட்டை மறக்காதீர்கள்” என்று பிரதமர் மோடி அறிவுறுத்தியுள்ளார்.
சென்னை ஐஐடியின் நிகழ்ச்சியில் கலந்து கொண்ட பிரதமர் மோடி, இந்தியா – சிங்கப்பூர் ஹேக்கத்தான் போட்டியில் வென்றோருக்கு பரிசுகளை வழங்கி உரையாற்றினார். மேலும் ஐஐடியின் 56ஆவது பட்டமளிப்பு விழாவில் மாணவர்களுக்கு பட்டங்களை வழங்கிய பின் பிரதமர் மோடி உரையாற்றினார். அப்போது, ரோபோட்டிக் உள்ளிட்ட நவீன தொழில்நுட்ப பிரிவில் மாணவர்கள் கவனம் செலுத்துகின்றனர். உலகின் டாப் 3 ஸ்டார்ட்அப் கண்டுபிடிப்பு நாடுகளில் இந்தியா இடம் பெற்றுள்ளது. வாகனம் சுகாதாரம் உள்ளிட்ட முக்கிய துறைகளில் ஸ்டார்ட்அப் தொழில்கள் அதிகரித்து வருகின்றன. புதுமை கண்டுபிடிப்புகளை ஊக்குவிப்பதில் ஐஐடி சென்னை சிறப்பான இடம் வகிக்கிறது.
கடின உழைப்பால் முடியாததையும் முடியக்கூடியதாக மாற்றும் ஆற்றல் மாணவர்களுக்கு உண்டு. ஓய்வு உறக்கம் மற்றும் உணவின்றி கண்டுபிடிப்புகளில் மாணவர்கள் ஆர்வம் காட்டி வருகின்றனர். முயற்சி, திறமை, அர்ப்பணிப்பு உணர்வு கொண்டவர்களுக்கு சரியான வாய்ப்புகள் காத்திருக்கின்றன. தண்ணீரை சுத்திகரித்து மறு உபயோகப்படுத்தும் வழிகளை கண்டறிவது அவசியம். வாழ்க்கை முறை நோய்கள்தான் எதிர்கால ஆரோக்கிய குறைபாட்டை ஏற்படுத்துவதாக உள்ளன. “எங்கு வேலை செய்தாலும் எங்கு வாழ்ந்தாலும் தாய்நாட்டை மறக்காதீர்கள்” எனவும் தெரிவித்தார்.