துபாய் இளவரசியை அவரின் தந்தையே மூன்று வருடங்களுக்கு முன்பு கடத்தி சிறை வைத்திருப்பதாக கூறப்பட்ட நிலையில் அவரின் புகைப்படம் வெளியாகியுள்ளது.
துபாய் இளவரசியான லதீபா அல் மக்தூம் என்பவரை அவரின் தந்தையே கடத்தி சிறையில் வைத்து கொடுமைப்படுத்தி வருவதாக கூறப்பட்டது. அவர் கடத்தப்பட்டு சுமார் மூன்று வருடங்களுக்கு பின் கடந்த வெள்ளிக்கிழமை அன்று தான் அவரது புகைப்படம் வெளியாகியிருக்கிறது.
அதாவது ஐக்கிய நாடுகள் சபையின் ஆதரவால் இயங்கும் ஆர்வலர்கள் குழுவானது, இளவரசி லதீபா உயிருடன் இருக்கிறார் என்பதற்கான ஆதாரம் வேண்டும் என்று கோரிக்கை விடுத்திருந்தது. இந்நிலையில் துபாய் அரசு இளவரசியின் இரண்டு புகைப்படங்களை வெளியிட்டிருக்கிறது.
லதீபா மூன்று மாதங்களுக்கு முன்பு தன் குடும்பத்தினரே தன்னை கடத்திவைத்து கொடுமைப்படுத்திவருவதாக பரபரப்பு வீடியோவை வெளியிட்டிருந்தார். மேலும் இளவரசியின் விருப்பத்திற்கு ஏற்ப துபாய் நிர்வாகம், ஐக்கிய அரபு அமீரகத்திலிருந்து வெளியேறுவதற்கு அனுமதியளிக்கும் என்ற நம்பிக்கை இருப்பதாக ஆர்வலர்களின் குழு தெரிவித்துள்ளது. மேலும் இந்த புகைப்படங்கள் தற்போது பதிவு செய்யப்பட்டது தான் என்று உறுதி செய்யப்பட்டிருக்கிறது.