இந்தியாவின் மிகப்பெரிய ஆன்லைன் ஷாப்பிங் தளமான ப்ளிப்கார்ட்டில் தற்போது பண்டிகையை முன்னிட்டு பிக் பில்லியன் டேஸ் விற்பனை தொடங்கியுள்ளது. இந்த பிக் பில்லியன் டேஸ் விற்பனையில் பல்வேறு விதமான பொருள்களுக்கு கவர்ச்சிகரமான ஆஃபர்கள் போடப்பட்டுள்ளது. இதனால் ஆன்லைனில் பொருட்களை வாங்கும் வாடிக்கையாளர்களின் எண்ணிக்கை நாள்தோறும் அதிகரித்துக் கொண்டே இருக்கிறது. இந்நிலையில் உத்தரப்பிரதேச மாநிலத்தைச் சேர்ந்த இளம் பெண் ஒருவர் ஃப்ளிப்கார்ட்டில் 1500 ரூபாய்க்கு வாட்ச் ஒன்றினை ஆர்டர் செய்துள்ளார். இந்த பார்சல் கடந்த 7-ம் தேதி இளம் பெண்ணின் வீட்டிற்கு வந்துள்ளது.
அந்த பார்சலை இளம் பெண்ணின் சகோதரர் பிரித்துப் பார்த்தபோது அவருக்கு பேரதிர்ச்சி காத்திருந்தது. அதாவது வாட்சுக்கு பதிலாக பார்சலில் சாண வறட்டி வந்துள்ளது. இதேபோன்று சமீபத்தில் கூட லேப்டாப் ஆர்டர் செய்த ஒரு வாலிபருக்கு சோப்பு டப்பா வந்தது. மேலும் ட்ரோன் ஆர்டர் செய்த நபருக்கு செங்கல் வந்துள்ளது. மேலும் பண்டிகை கால ஆஃபர்களில் ஆன்லைன் ஷாப்பிங் தளங்களில் ஆர்டர் செய்த பொருளுக்கு பதிலாக மாற்றுப் பொருள் வருவது தொடர்பான செய்திகள் அவ்வப்போது வந்து கொண்டிருப்பதால் ஆன்லைன் ஷாப்பிங் தளத்தில் பொருட்களை வாங்கும் வாடிக்கையாளர்கள் மிகவும் கவனத்துடன் இருக்க வேண்டும்.