டிராக்டரின் மீது மொபட் மோதிய விபத்தில் இளம்பெண் பலியாகிய குழந்தை உட்பட 2பேர் படுகாயம் அடைந்த சம்பவம் சோகத்தை ஏற்படுத்தியுள்ளது.
தூத்துக்குடி மாவட்டத்திலுள்ள சிப்பிப்பாறை பகுதியில் பிரபு கண்ணன் என்பவர் தனது குடும்பத்துடன் வசித்து வருகின்றார். இவர் தற்போது வெளிநாட்டில் பணிபுரிந்து வருகின்றார். இவருக்கு ராஜலட்சுமி என்ற மனைவி இருந்துள்ளார். இந்தத் தம்பதிகளுக்கு தன்யா ஸ்ரீ என்ற குழந்தை இருக்கின்றார். இந்நிலையில் ராஜலட்சுமி, குழந்தை தன்யா ஸ்ரீ மற்றும் அதே பகுதியில் வசிக்கும் ஜானகி என்பவருடன் இணைந்து கோவில்பட்டிக்கு செல்வதற்காக மொபட்டில் விலக்கு பகுதியில் சென்று கொண்டிருந்தனர். அப்போது ராஜலட்சுமி சென்றுகொண்டிருந்த மொப்பட்டின் டயர் திடீரென பஞ்சரானதால் கட்டுப்பாட்டை மீறி வேகமாக சென்று அவ்வழியில் நின்று கொண்டிருந்த டிராக்டரின் மீது மோதி விட்டது.
இந்த விபத்தில் 3 பேரும் தூக்கி வீசப்பட்டதால் படுகாயமடைந்து உயிருக்குப் போராடிக் கொண்டிருந்தனர். இதனையடுத்து அருகிலிருந்தவர்கள் படுகாயமடைந்த ராஜலட்சுமி, குழந்தை தன்யா ஸ்ரீ மற்றும் ஜானகியை உடனடியாக மீட்டு சிகிச்சைக்காக அரசு மருத்துவமனையில் அனுமதித்துள்ளனர். ஆனால் அங்கு ராஜலட்சுமிக்கு அளிக்கப்பட்ட சிகிச்சை பலனின்றி அவர் பரிதாபமாக உயிரிழந்து விட்டார். அங்கு குழந்தை மற்றும் ஜானகிக்கு தீவிர சிகிச்சை அளித்து வருகின்றனர். இது குறித்து தகவல் அறிந்த காவல்துறையினர் மருத்துவமனைக்கு விரைந்து சென்று ராஜலட்சுமியின் உடலை கைப்பற்றி உடற்கூறு ஆய்வுக்காக அனுப்பி வைத்துள்ளனர். மேலும் இச்சம்பவம் குறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.