வீட்டிற்குள் நுழைந்து நகை மற்றும் பணத்தை மர்ம நபர்கள் கொள்ளையடித்து சென்ற சம்பவம் பரபரப்பை ஏற்படுத்தியுள்ளது.
விருதுநகர் மாவட்டத்திலுள்ள பி.ராமச்சந்திராபுரம் பகுதியில் ரமேஷ் என்பவர் வசித்து வருகின்றார். இவர் கத்தார் நாட்டில் பணிபுரிந்து வந்தார். ஆனால் தற்போது சொந்த ஊரான பி.ராமச்சந்திராபுரத்திற்கு வந்துள்ளார். இந்நிலையில் ரமேஷ் தனது குடும்பத்தினருடன் தூங்கிக் கொண்டிருக்கும் போது வீட்டின் கதவை உடைத்து மர்ம நபர்கள் உள்ளே நுழைந்துள்ளனர். இதனையடுத்து வீட்டின் பீரோவில் இருந்த நகை மற்றும் பணத்தை மர்ம நபர்கள் கொள்ளையடித்த போது சத்தம் கேட்டு வீட்டில் இருப்பவர்கள் எழுந்து வருவதற்குள் அவர்கள் அங்கிருந்து தப்பி ஓடிவிட்டனர்.
இதனால் அதிர்ச்சியடைந்த ரமேஷ் மற்றும் அவரது குடும்பத்தினர் வன்னியம்பட்டி காவல் நிலையத்தில் புகார் கொடுத்துள்ளனர். அந்த புகாரின்படி காவல்துறையினர் சம்பவ இடத்திற்கு விரைந்து சென்று விசாரணை நடத்தியபோது வீட்டில் இருந்த 20 பவுன் நகை மற்றும் 5 ஆயிரம் ரூபாய் கொள்ளை போனது தெரிய வந்துள்ளது. அதன்பின் சம்பவ இடத்திற்கு கைரேகை நிபுணர்கள் வந்து தடயங்களை சேகரித்தனர். மேலும் மோப்ப நாய் வரவழைக்கப்பட்டு சோதனை மேற்கொள்ளப்பட்டது. மேலும் இதுகுறித்து போலீஸ் துணை சூப்பிரண்டு நமச்சிவாயம் உத்தரவின்படி, நகையை திருடிச் சென்ற கொள்ளையர்களை பிடிப்பதற்கு தனிப்படை அமைக்கப்பட்டு வலைவீசி தேடி வருகின்றனர்.