தமிழகத்தில் ஈரோடு மாவட்டம் கொரோனா இல்லாத மாவட்டமாக மாறியுள்ளது மக்களுக்கு மகிழ்ச்சியை ஏற்படுத்தியுள்ளது.
இந்தியாவில் வேகமாக பரவி வரும் கொரோனா வைரஸை கட்டுப்படுத்த மத்திய மாநில அரசுகள் பல்வேறு நடவடிக்கைகளை மேற்கொண்டு வருகின்றன. நாடு முழுவதுமே மூன்றாம் தேதி வரை ஊரடங்கு உத்தரவு பிறப்பிக்கப்பட்டுள்ளது. இருந்தும் கொரோனா தீவிரம் தொடர்ந்து அதிகரித்து வருவதால் ஊரடங்கு நீட்டிப்பது தொடர்பான பல்வேறு கோரிக்கைகளை மாநில அரசுகள் பிரதமர் மோடியிடம் முன்வைத்து வருகின்றன.
தமிழகத்திலும் கொரோனா பாதிப்பு தொடர்ந்து அதிகரித்து வருகிறது. தமிழ்நாட்டில் 1937 பேருக்கு கொரோனா உறுதி செய்யப்பட்டு, இந்திய அளவில் கொரோனா அதிகம் பாதித்த ஆறாவது மாநிலம் என்ற வரிசையில் இருக்கிறது. அதே நேரத்தில் தமிழகத்தில் மேற்கொள்ளப்படும் நல்ல சுகாதார தடுப்பு நடவடிக்கையால் கொரோனா பாதித்த 1107 பேர் குணமாகி இந்தியாவிலேயே அதிகமானோரை குணப்படுத்த இரண்டாவது மாநிலம் என்ற நிலையில் தமிழகம் உயர்ந்து நிற்கிறது.
இந்நிலையில் ஈரோடு மாவட்டத்தில் கொரோனா பாதித்த 70 பேரும் சிகிச்சை பெற்று தற்போது பூரண குணமடைந்துள்ளனர். இதனால் ஈரோட்டில் யாருக்கும் கொரோனா பாதிப்பு இல்லாத மாவட்டமாக விளங்குகின்றது. இது மக்களுக்கு மகிழ்ச்சியை ஏற்படுத்தியுள்ளது.