பிக் பாஸ் நிகழ்ச்சியில் பங்கேற்ற பிரபலம் அடைந்த நடிகை யாஷிகா ஆனந்த் கடந்த சனிக்கிழமை இரவு புதுச்சேரியில் இருந்து கிழக்கு கடற்கரை சாலை வழியாக காரில் சென்னைக்கு வந்தபோது மகாபலிபுரம் அருகே விபத்தில் சிக்கினார். அந்த விபத்தில் அவருடன் காரில் வந்து ஐதராபாத்தை சேர்ந்த அவரது பெண் தோழி வள்ளி பவானி சம்பவ இடத்திலேயே பரிதாபமாக உயிரிழந்தார். மற்ற ஆண் நண்பர்கள் இருவரும், யாஷிகாவும் காயத்துடன் கிரீம்ஸ் ரோடு அப்போலோ மருத்துவமனையில் சிகிச்சைக்காக அனுமதிக்கப்பட்டுள்ளனர்.
இதையடுத்து மருத்துவமனையில் சிகிச்சை பெற்று வரும் நடிகை யாஷிகாவிடம் போலீசார் வாக்குமூலம் பெற்றுள்ளனர். இதில் காரை யாஷிகா ஓட்டி வந்தது உறுதியாகியுள்ளது. அதிவேகமாக காரை ஓட்டி வந்ததால் கார் கட்டுப்பாட்டை இழந்ததாகவும், அவரது தோழி பவானி சீட் பெல்ட் அணியாததால் விபத்தில் மரணம் அடைந்ததாகவும் தெரியவந்துள்ளது. மேலும் யாஷிகா கார் ஓட்டிய வீடியோ தற்போது வைரல் ஆகி வருகிறது.