கொரோனா தொற்று தடுப்பு வழிமுறைகளை பின்பற்றாத காரணத்திற்காக மின்வாரிய அதிகாரிகளுக்கு இரண்டு லட்ச ரூபாய் அபராதம் விதித்து மாவட்ட கலெக்டர் உத்தரவிட்டுள்ளார்.
நீலகிரி மாவட்டத்தில் உள்ள காட்டு குப்பை என்ற பகுதியில் புதிய மின் திட்ட பணிகள் நடைபெற்றுக் கொண்டிருக்கிறது. இதனால் அங்கு சுரங்கப்பாதை அமைத்து மின் உற்பத்திக்காக நவீன எந்திரங்கள் பொருத்தும் பணியானது தீவிரமாக நடைபெற்றுக் கொண்டிருக்கிறது. இந்நிலையில் இந்த பணியில் ஈடுபட்டுள்ள ஜார்கண்ட் மாநிலத்தைச் சேர்ந்த 20 தொழிலாளர்களுக்கு தொற்று உறுதி செய்யப்பட்டுள்ளது.
இதனையடுத்து அங்கு பணிபுரியும் மற்ற தொழிலாளர்கள் முக கவசம் அணியாமலும் சமூக இடைவெளியை பின்பற்றாமலும் இருந்ததால் தொற்று பரவும் அபாயம் ஏற்பட்டுள்ளது. இதனால் கொரோனா பரவலுக்கு காரணமாக இருந்த மின்வாரிய அதிகாரிகளுக்கு பாதுகாப்பு வழிமுறைகளை முறையாக பின்பற்றாத குற்றத்திற்காக இரண்டு லட்ச ரூபாய் அபராதம் விதித்து மாவட்ட கலெக்டர் அதிரடியாக உத்தரவிட்டுள்ளார். மேலும் அந்த இடத்தை தனிமைப்படுத்தப்பட்ட பகுதியாக அறிவித்து மாநகராட்சி அதிகாரிகள் சுகாதார நடவடிக்கைகளை மேற்கொண்டுள்ளனர்.