பயன்பாட்டில் இல்லாத அணுமின் நிலையத்தில் ஏற்பட்ட தீயை 6 மணி நேர போராட்டத்திற்கு பின் தீயணைப்பு வீரர்கள் அணைத்தனர்
தூத்துக்குடி மாவட்டத்தில் கடந்த நான்கு ஆண்டுகளாக தனியாருக்கு சொந்தமான அணுமின் நிலையம் ஒன்று செயல்படாமல் மூடி வைக்கப்பட்டுள்ளது. இங்கு பராமரிப்பு பணிகள் மட்டும் அவ்வபோது நடைபெறுகிறது. இந்நிலையில் அணுமின் நிலையத்தில் உள்ள மின் ஒயர் மற்றும் எண்ணெய் போன்றவற்றில் திடீரென தீ பற்றியதால் பல அடி உயரத்துக்கு தீயானது கொழுந்துவிட்டு எரிந்து, அப்பகுதியே கரும் புகையால் சூழ்ந்தது.
இச்சம்பவம் குறித்து தீயணைப்பு துறைக்கு தகவல் தெரிவிக்கப்பட்டது. இதனையடுத்து முத்தையாபுரம், தெர்மல் நகர், சிப்காட் மற்றும் ஒட்டப்பிடாரம் போன்ற பகுதிகளிலிருந்து வந்த தீயணைப்பு வீரர்கள் 6 மணி நேர போராட்டத்திற்கு பின் தீயை அணைத்தனர். இந்நிலையில் மின் கசிவு ஏற்பட்டதால் தான் தீ விபத்து ஏற்பட்டுள்ளதாக விசாரணையில் தெரியவந்துள்ளது. மேலும் இதுகுறித்த புகாரின்பேரில் போலீசார் வழக்குப் பதிந்து விசாரித்து வருகின்றனர்.