சிகரெட்டை பற்ற வைக்க முயற்சி செய்த போது தீ விபத்து ஏற்பட்டு வெல்டிங் தொழிலாளி உயிரிழந்த சம்பவம் சோகத்தை ஏற்படுத்தியுள்ளது.
சென்னை மாவட்டத்திலுள்ள மாங்காடு பகுதியில் காஜா மைதீன் என்ற வெல்டிங் தொழிலாளி வசித்து வந்துள்ளார். இவருக்கு பாத்திமா என்ற மனைவி உள்ளார். இந்த தம்பதிகளுக்கு மூன்று மகள்கள் இருக்கின்றனர். இந்நிலையில் அதிகாலையில் காஜா மைதீன் சிகரெட் பிடிப்பதற்காக லைட்டரை பற்ற வைத்த போது திடீரென தீப்பிடித்து எரிய ஆரம்பித்துள்ளது. இதனால் காஜாமைதீன் மீது தீ பற்றி எரிந்து அவர் வலியில் அலறி சத்தம் போட்டுள்ளார். இந்த சத்தத்தை கேட்டு அவரது மனைவி மற்றும் மகள்கள் அவரை காப்பாற்ற முயன்ற போது அவர்கள் மீதும் தீப்பற்றி எரிய ஆரம்பித்துள்ளது. இதனை அடுத்து அக்கம்பக்கத்தினர் படுகாயம் அடைந்த 5 பேரையும் மீட்டு அரசு மருத்துவமனையில் சிகிச்சைக்காக அனுமதித்துள்ளனர்.
ஆனால் அங்கு அளிக்கப்பட்ட சிகிச்சை பலனின்றி காஜா மைதீன் பரிதாபமாக உயிரிழந்து விட்டார். மேலும் அவரது மனைவி மற்றும் மகள்களுக்கு மருத்துவமனையில் தீவிர சிகிச்சை அளிக்கப்பட்டு வருகிறது. இது குறித்து வழக்குப்பதிவு செய்த காவல்துறையினர் நடத்திய விசாரணையில் காஜா மைதீனின் குடும்பத்தினர் கேஸ் சிலிண்டரை சரியாக அடைக்காமல் இருந்துள்ளனர். இதனால் சிலிண்டரில் கசிவு ஏற்பட்டு கேஸ் வீடு முழுவதும் பரவி இருந்த சமயத்தில் காஜா மைதீன் சிகரெட் பிடிப்பதற்காக லைட்டரை பற்ற வைத்துள்ளார். இதனால் தீ விபத்து ஏற்பட்டது காவல்துறையினர் நடத்திய விசாரணையில் தெரியவந்துள்ளது.