வீட்டின் பூட்டை உடைத்து 50,000 ரூபாயை கொள்ளையடித்து சென்ற மர்மநபர்களை காவல்துறையினர் தேடி வருகின்றனர்.
ராமநாதபுரம் மாவட்டம் கமுதியை அடுத்துள்ள கே.வேப்பங்குளம் பகுதியில் செல்லம் என்பவர் வசித்து வந்துள்ளார். இந்நிலையில் இவர் மற்றும் இவரது குடும்பத்தினர் ஜவுளி வாங்குவதற்காக வீட்டை பூட்டி விட்டு கமுதிக்கு சென்றுள்ளனர். இதனையறிந்த மர்மநபர்கள் செல்லம் வீட்டின் பூட்டை உடைத்து பீரோவில் இருந்த பணத்தை திருடி சென்றுள்ளனர்.
இதனையடுத்து செல்லம் வீட்டிற்கு வந்து பார்த்த போது வீட்டின் கதவு உடைக்கப்பட்டு பொருட்கள் சிதறி இருந்துள்ளது. மேலும் பீரோவில் இருந்த 50,000 ரூபாய் திருடு போயிருந்துள்ளது. இதனை பார்த்து அதிர்ச்சியடைந்த அவர் உடனடியாக கமுதி காவல்நிலையத்தில் புகார் அளித்துள்ளார். அந்த புகாரின் அடிப்படையில் காவல்துறையினர் வழக்குபதிவு செய்து விசாரணை நடத்தி வருகின்றனர்.