பிரெஞ்ச் ஓபன் டென்னிஸ் போட்டியில் ஜோகோவிச், ரபேல் நடால் காலிறுதி சுற்றுக்கு முன்னேறி உள்ளனர்.
பிரெஞ்ச் ஓபன் டென்னிஸ் போட்டி பாரிசில் நடந்து வருகிறது .இதில் ஆண்களுக்கான ஒற்றையர் பிரிவில், செர்பியாவை சேர்ந்த நம்பர் ஒன் வீரர் ஜோகோவிச் , இத்தாலி வீரரான மசெட்டியுடன் மோதினார். இதில் முதல் 2 செட்டை மசெட்டி கைப்பற்றினார். அதன் பிறகு சுதாரித்துக்கொண்ட ஜோகோவிச் 3 மற்றும் 4 வது செட்டை 6-1 , 6-0 கைப்பற்றினார்.
5வது செட்டில் ஜோகோவிச் 4-0 என்ற கணக்கில் முன்னிலை வகித்தார். ஆனால் அப்போது மசெட்டிக்கு காயம் ஏற்பட்டதால், அவர் போட்டியிலிருந்து விலகினார். இறுதியாக ஜோகோவிச் 6-7, 6-7, 6-1,6-0, 4-0 என்ற செட் கணக்கில் வெற்றி பெற்று காலிறுதி சுற்றுக்கு முன்னேறினார். இதற்கு முன் நடைபெற்ற மற்றொரு போட்டியில், ஸ்பெயின் வீரர் ரபெல் நடால் , இத்தாலிய வீரரான ஜானி சினரை 7-5, 6-3, 6-0 செட் கணக்கில் வீழ்த்தி , காலிறுதி சுற்றுக்கு முன்னேறினார்.